Jobo 35 - BIBELE

¹ Elehu a bua hape, a re:

² “Na o bona ho nepahetse ha o re: ‘Nna ke lokile ho feta Modimo?’

³ O re ho yena: ‘Molemo ke ofe oo ke tla o bona? ke tla boellwa keng ka ho se etse sebe?’

⁴ “Jwale nna polelo tsa hao ke tla di araba, le tsona tsa metswalle ya hao.

⁵ Lelalla mahodimong o ke o bone, tadima maru a o phahametseng.

⁶ Ha o etsa sebe Modimo o mo senyetsa eng? Ha o ngatafatsa tshito tsa hao, hoo hona ho mo etsetsa eng?

⁷ Haeba o lokile o mo nea eng? Kapa o amohela eng letsohong la hao?

⁸ Bokhopo ba hao bo senyetsa ba jwaloka wena, ho loka ha hao ho thusa ba jwaloka wena.

⁹ “Batho ba lliswa ke ho hatellwa haholo, ba llela ho namolelwa kgokeng tsa ramonatla.

¹⁰ Empa ha ho ya reng: ‘Modimo, Mmopi wa ka, o kae, ya re kgothatsang ka difela bosiu,

¹¹ ya re rutang ho fetisa phoofolo tsa naha, ya re hlalefisang ho fetisa nonyana tse fofang?’

¹² Leha ba ipiletsa, yena ha a arabe, ka baka la boikakaso ba ba etsang bokgopo.

¹³ Ruri Modimo a ke ke a mamela mafeela, Ya Matla wohle a ke ke a a natsa.

¹⁴ “A ka o mamela jwang, o re ha o mmone; o re nyewe ya hao e kapele ho yena, wena o so lebeletse yena feela?

¹⁵ O ithetsa ka ho re kgalefo ya hae ke mosesetso, esita le bokgopo Modimo ha a bo natse.

¹⁶ Ka baka lena, Jobo o bua feela, o pepeta haholo, feela a se na tsebo.”