Jobo 34 - BIBELE

Elehu o bontsha ho loka ha Modimo

¹ Yaba Elehu o tswela pele, o re:

² “Lona bahlalefi mamelang polelo tsa ka! Lona bo-tsebanyane theang tsebe le mmamele!

³ Tsebe e hlwaya mantswe ha a buuwa, jwalokaha dijo di latsuwa ke mahalapa.

⁴ A re ikgetheleng se lokileng ka borona, a re tsebeng ka borona se leng molemo.

⁵ “Jobo o re: ‘Nna ha ke na molato, empa Modimo o nkamohile tokelo ya ka.

⁶ Le hoja ke nepile tjena ho thwe ke leshano, le hoja ke se na sebe, qeba la ka le hana ho fola.’

⁷ “Motho ke ofe ya tshwanang le Jobo? O momorotsa nyefolo jwalokaha metsi a nowa;

⁸ yena o tsamaya mokgatlong wa baetsadibe, ba kgopo o tsamaisana tsela le bona;

⁹ o re: ‘Motho a ke ke a putswa ka letho, leha a leka ho kgahlisa Modimo.’

¹⁰ “Lona bahlalefi, mmameleng ke hona: Modimo a ke ke a ba a etsa bokgopo, Ya Matla wohle a ke ke a ba a etsa phoso.

¹¹ O putsa motho ho ya ka mesebetsi ya hae, o putsa motho ho ya ka metsamao ya hae.

¹² Ruri Modimo a ke ke a ba a etsa bokgopo, Ya Matla wohle a ke ke a kgopamisa ho loka.

¹³ O beilwe ho okamela lefatshe ke mang? Fatshe lohle lona le theilwe ke mang?

¹⁴ Haeba e ne le morero wa hae, a busetsa moya wa bophelo ho yena,

¹⁵ tsohle tse phelang di ne di tla timela, motho le yena, a kgutlele leroleng.

¹⁶ “Ha o le bohlale, ako mamele, polelo tsa ka o di sekehele tsebe!

¹⁷ Na ya hloileng toka, ho busa a ka ho tseba? Kapa o ahlola Ya Matla, Ya Lokileng?

¹⁸ Yena ya reng ho kgosi: ‘O motho-dikobo,’ ho mahosana: ‘Lona le balotsana!’

¹⁹ Ha a ye ka leeme ha a sebeletsa babusi, morui le mofutsana ke ditshwantshwang ho yena, kahoba bohle ke mmopo wa matsoho a hae.

²⁰ Ka ho panya ha ntshi ba shwa le hara bosiu, tjhaba se hlokolehe, bona ebe ba iketse; natla di nyamele di sa angwa ke letsoho la motho!

²¹ “Mahlo a hae a disitse metsamao ya batho, mehato yohle ya batho le yona o a e bona.

²² Ha ho na lefifi le letsholetsho, moo baetsadibe ba ka tsebang ho ipata.

²³ Modimo ha a hloke ho balla batho dinako ho tla kahlolong, kapele ho yena.

²⁴ O thuakanya bo-ramonatla ho se na nyewe, tulong tsa bona ebe o bea ba bang.

²⁵ Ka baka leo, mesebetsi ya bona o a e tseba, ba phetholwa e le bosiu, ebe ba a phetshelwa.

²⁶ Modimo o ba otlela bokgopo ba bona, o ba otlela pontsheng ya batho bohle,

²⁷ hobane ba kgaoditse ho mo latela, ha ba a ka ba natsa tsela tsohle tsa hae.

²⁸ Dillo tsa mafutsana ba di fihlisitse ho yena, dillo tsa bahlomohi Modimo o a di utlwa.

²⁹ “Haeba a ikgutsetsa a ka nyatswa ke mang? Ha ipata sefahleho, teng a ka bonwa ke mang? O okametse batho le ditjhaba ka ho tshwana.

³⁰ O thibela motho ya kgopo ho busa, a mo thibele ha a tjhehela setjhaba maraba.

³¹ “Haeba motho a ka re ho Modimo: ‘Ke ipona molato, nke ke ka sitwa hape;

³² ako nthute tseo ke sa di tsebeng, haeba ke entse bokgopo nke ke ka pheta hape;’

³³ na o re Modimo a ye ka thato ya hao, athe wena o nyatsa diketso tsa hae? Boikgethelo ke ba hao, hase ba ka, kahoo wena bolela seo o se tsebang.

³⁴ “Ba nang le kutlwisiso ba tla bolela, banna ba bohlale, ba nkutlwang, ba re:

³⁵ ‘Jobo o ipuela feela a se na tsebo, polelo tsa hae bohlale di a bo hloka.’

³⁶ Jobo a nna lekwe ho-ya-ho-ile, hobane o araba sa batho ba kgopo.

³⁷ Dibe tsa hae o di eketsa ka bofetohedi, o etsa nyediso moo re mo utlwang, ka polelo tse ngata o nyedisa Modimo.”