Jobo 32 - BIBELE

Elehu o bua le metswalle ya Jobo

¹ Banna ba bararo bana ba kgaotsa ho araba Jobo, hobane o ne a itadima a lokile.

² Jwale kgalefo ya Elehu, mora wa Barakele, ya tswang Buse, wa lelapa la Rama, ya tlokoma. Kgalefo ya hae ya tlokomela Jobo, hobane Jobo o ne a re ke yena ya lokileng, Modimo ke yena ya phoso.

³ Kgalefo eo ya hae ya ba ya tlokomela le metswalle ya hae e meraro, hobane leha e ne e nyatsa Jobo, e ne e hloleha ho mo araba.

⁴ Elehu o ne a ile a emela banna bao hore ba bue le Jobo pele ho yena, hobane ba ne ba le baholo ho yena.

⁵ Ha a bona hore banna bao ba bararo ba feletswe ke puo, kgalefo ya hae ya nna ya tlokoma.

⁶ Yaba Elehu, mora wa Barakele, ya tswang Buse, o a bua, o re: “Ke sa le mmotlana, lona le tsofetse, ka hona ke ile ka itshwara, ka tshaba ho le bolella seo ke se tsebang.

⁷ Ke ile ka nahana: ‘Eka kgona baholo ba bue, ba lemo di ngata ba rute bohlale.’

⁸ Empa ke moya o ka ho motho, e leng moya wa Ya Matla wohle, wona o neang motho kutlwisiso.

⁹ Hase ba baholo feela ba nang le bohlale, kapa maqheku feela a utlwisisang ho lokileng.

¹⁰ Ka baka leo, ke re le ke le mmamele, le nna ke bolele seo ke se tsebang.

¹¹ “Ke ile ka le emela hore le ke le bue, puo tsa lona ka di theela tsebe ha le ntse le kgetha mantswe.

¹² Ke fetse ka le mamela: Ha ho le ya mong ya shanofaditseng dipuo tsa Jobo, kapa ya arabileng polelo tsa hae.

¹³ Hlokomelang, le se ke la re: ‘Rona bohlale re bo fumane; Modimo ke yena ya tla mo hlola, a ke ke a hlolwa ke motho.’

¹⁴ Polelo tsa Jobo di ne di sa lebiswa ho nna, nke ke ka mo araba jwaloka lona.

¹⁵ “Banna bana ba nyahame dipelo, ba se ba feletswe ke dikarabo, mantswe le wona a a ba haella.

¹⁶ Ebe nka lebella, hobane ba sa arabe, hobane ba themeletse, ba se ba hloka puo?

¹⁷ Le nna ke tla hlahisa ya ka karabo, ke be ke bolele seo ke se tsebang.

¹⁸ Ke pipitlelane ke mantswe, moya wa ka o ntshusumetsa hore ke bue;

¹⁹ fuba sa ka se ka veine e bitieletswe, se kgatheng la ho phatloha sa makuka a matjha.

²⁰ Ke tla bua, ho pipitlelwa ho fele; ke tla tswa molomo, le nna ke arabe.

²¹ Ha nka ke ka tadima tshobotsi ya motho, ha nka ke ka kakamatsa mang le mang.

²² Ha ke ne ke tseba ho kakamatsa, Mmopi wa ka o na ntlosa ka ho panya ha ntshi!”