Jobo 31 - BIBELE

Jobo o tiisa botshepehi ba hae

¹ “Ke entse tumellano le mahlo a ka, hore ha a ka ke a tjhatjhehela kgarebe.

² “Kabelo e tswang ho Modimo ke efe? Lefa le tswang ho Ya Matla wohle ke lefe?

³ Na hase timelo ho baetsadibe, le koduwa ho ba etsang bokgopo?

⁴ Modimo tsela tsa ka o a di bona, le mehato ya ka yohle o a e bala.

⁵ “Haeba ke sebeditse ka bolotsana, eba oto la ka le mpotlakiseditse ho ya thetsa;

⁶ a nke ke bewe sekaleng sa toka, Modimo a tle a tsebe ha ke na molato.

⁷ Haeba mehato ya ka e kgelohile tseleng, eba pelo ya ka e hohetswe ke mahlo a ka, eba manothoko a nkgomaretse matsohong;

⁸ seo ke se jetseng se ke se jewe ke e mong, dijalo tsa ka, ka metso, di ke di motsulwe.

⁹ “Haeba pelo ya ka e hohetswe ke mosadi, eba nkile ka lalla monyakong wa mohaeso,

¹⁰ mosadi wa ka a silele monna e mong, ba bang ba kopanele dikobo le yena.

¹¹ Hona e ka ba ketso e hlabisang dihlong, ya eba sebe se lokelwang ke ho ahlolwa.

¹² Ke mollo o tjhesang ho isa timelong, o tla fedisa maruo a ka kaofela.

¹³ “Haeba mohlanka wa ka le lekgabunyane la ka, ke ba hloketse toka ha ba tsekisana le nna,

¹⁴ ke tla etsang ha Modimo a sa ntobile? Ke tla reng ha ke araba potso tsa hae?

¹⁵ Ha ke re Mmopi wa ka ke Mmopi wa bona? Ha ke re ke yena ya re bopileng maleng a bo-mma rona?

¹⁶ “Haeba nkile ka hanyetsa kopo ya mofutsana, eba mohlolohadi o lebeletse, mahlo a ba kgathala;

¹⁷ eba ke itjeletse thathana ke le inotshi, kgutsana ka e jela tjelamahlong,

¹⁸ ho tloha botjheng ba ka ke e hodisitse ke le ntata, ka baballa mohlolohadi ho tloha mohla ke tswalwang,

¹⁹ haeba nkile ka bona motho a eshwa ke ho hloka diaparo, kapa mofumanehi a se na le nketlana;

²⁰ haeba ho se ya kileng a ntlohohonolofatsa, leha a ile a futhumatswa ke boya ba nku tsa ka;

²¹ haeba nkile ka otla kgutsana ka tsoho la ka, hobane ke tseba hore ka kgotla nke ke ka tsuwa,

²² phaka sa ka a se motsuhe lehetleng, tsoho la ka le robehe setsweng, lenonyeletsong.

²³ Ho tshaba Modimo ho ne ho nthibela, tlotla ya hae e ntshabisa ho etsa tsena.

²⁴ “Haeba nna ke itshepetse kgauta feela, eba kgauta e hlwekisitsweng ke tshepa la ka;

²⁵ haeba ke nyakaladitswe ke ho rua haholo, hobane ka matsoho a ka ke sebeditse haholo;

²⁶ haeba nkile ka boha tsatsi ha le phatsima, kapa kgwedi e tsamaya ka leredi la yona,

²⁷ kunutung la pelo ya ka ka lekeha, ka aka tsoho la ka ho di obamela,

²⁸ tsena le tsona ke dibe tsa ho ahlolwa ke baahlodi, hoba Modimo ya kahodimo ke tla be ke mo latotse.

²⁹ “Na nkile ka thabela bomadimabe, madimabe ba sera sa ka, kapa ka thoholetsa ha se welwa ke ditsietsi?

³⁰ Ka molomo wa ka ha ke eso bue bokgopo, ka ho lakaletsa bophelo ba sona thohako.

³¹ Na ba lapa la ka ba kile ba re: ‘Ke mang ya sa kang a ja, a kgotsofala?’

³² Ha ho na moeti ya kila lala thoteng, menyako ya lapa la ka e buletswe batsamai.

³³ “Haeba nkile ka pata sebe sa ka jwaloka Adama, ka ho boloka makgopo a ka ka fubeng sa ka,

³⁴ ka baka la ho tshaba matshwele a batho, le ho tshaba ho nyediswa ke bang ka nna, ke ne ke tla kgutsa, ebe ke tswela kantle.

³⁵ “Ekaba ke mang ya tla mmamela! Bonang, mongolo wa ka ke ona! Ya Matla wohle a ke a nkarabe, moqosi wa ka a ngolle nna moqosuwa qoso!

³⁶ Ruri ke ne ke tla e jara hetleng la ka, ke e rwale sa mofapahlooho o rwalwa.

³⁷ Ke ne ke tla mmalla mehato ya ka kanngwe, ke atamele ho yena ke tsamaya seka kgosana.

³⁸ “Haeba masimo a ka a a nqosa, eba foro tsa wona di tletse dikgapha;

³⁹ haeba tholwana tsa wona ke di jele lehahla, kapa monga tsona ka mmolaya,

⁴⁰ bakeng sa koro ho ke ho mele meutlwa, bakeng sa harese ho ke ho mele lehola!” Polelo tsa Jobo di fella mona.