Jobo 30 - BIBELE

Jobo o lliswa ke bomadimabe ba hae

¹ “Ba banyenyane ho nna jwale ba a ntshoma, bao bo-ntata bona ke neng ke ba nyedisa, ke neng nke ke ka ba disisa mohlape le ntja tsa ka.

² Matla a bona a na sa nthuse ka letho, kaha bokwakwariri bo ne bo ba feletse.

³ Ke mekojwane ya bofuma le sekoboto, ba phela ka ho ja metsuntsunyane, bosiu ba lelera mahalaopeng.

⁴ Ba kga bodiladilane hara dihlahla, metso ya tshinabele ke dijo tsa bona.

⁵ Ba lelekwa hara batho ba bang, ba kueletswe jwalokaha eka ke mashodu.

⁶ Ba phela ka mangopeng a dikgohola, ka madumeleng le kahara mafika;

⁷ ba bokolla ba le kahara dihlahla, ba sunyame mmoho katlasa bobatsi.

⁸ Ke bana ba mawatla, bo-mohloka-lebitso, ba lelekilwe lefatsheng, hara batho.

⁹ “Jwale ke bona ba ntlakang ka pina, ke se ke fetohile sesomo ho bona.

¹⁰ Ba se ba nnyonya ba bile ba nkwekwetla, fahleho sa ka ba se tshwela ka mathe.

¹¹ Kahoba Modimo a mphokodisitse, a ntshotlile, ha ba sa itshwara leha ba le pela ka.

¹² Ka ho le letona ba mphutuhela ka sekgakgatha, ha ke baleha ba mpea merebele, ba haha metero ho nketsetsa thibella.

¹³ Ba tjhekile mamena tseleng ya ka, ba atlehiswa ke tshenyeho ya ka, ba re: ‘Ha a na mothusi!’

¹⁴ Ba kena jwalokaha eka rako le wele, ba subuhlellana hara masupi!

¹⁵ Matshabeho wohle a nkwetse hodimo, a ntlositse seriti ka ho panya ha ntshi, maruo a ka a fedile sa mouwane.

¹⁶ “Moya wa ka o qhashoha kahare ho nna, matsatsi a ho hlokofatswa a mphihletse;

¹⁷ ke lala ke tjhobelwa ke masapo bosiu, bohloko bo nkokonang ha bo mphe sebaka.

¹⁸ Matla a bohloko ba ka a senya aparo tsa ka, a nkgama jwaloka molala wa hempe ya ka.

¹⁹ Modimo o nkakgetse kahara seretse, ke se ke tshwana le lerole le wona molora.

²⁰ “Ke ipiletsa ho wena, Modimo, empa ha o nkarabe; ke ema kapela hao, empa o ntadima feela!

²¹ O mphuthuhela o se na mohau, tsoho la hao le matla le a ntwantsha.

²² O mphahamisetsa hodimo, moyeng, ka sefefo o nkakgoletse kwana le kwana.

²³ Ke a tseba hoba o tla nkisa lefung, tlung e kgethetsweng bohle, bohle ba phelang.

²⁴ “Ha ke re ya shwang o otlolla letsoho la hae, ha a llela thuso tlokotsing ya hae?

²⁵ Na ha ke a ka ka llela ba ditsietsing? Moya wa ka ha o a utlwela ba maswabing bohloko?

²⁶ Ha ke ne ke lebeletse molemo, ka tlelwa ke bobe; ha ke ne ke lebeletse lesedi, ka tlelwa ke lefifi.

²⁷ Mala a ka a a qhuqhuma, a hloka phomolo, matsatsi a ditlokotsi a tobane le nna.

²⁸ Ke tsamaya ke nyahame pelo, ho se na lesedi; ke ema hara mokgopi ho ikopela thuso.

²⁹ Ke se ke fetohile ngwanabo phokojwe, ke molekane wa madinyane a mpshe.

³⁰ Tlalo la ka le letsho ke ho kgakgapheha, masapo a ka a a tjhesa ke ho opelwa.

³¹ Harepa ya ka e letsa kodi-ya-malla, melodi ya kodilo la ka e fetohile dillo.”