Jobo 3 - BIBELE

Jobo o rohaka letsatsi la tswalo ya hae

¹ Kamora tsena, Jobo a tswa molomo, a rohaka letsatsi leo a neng a tswalwe ka lona.

² A bua, a re:

³ “Tsatsi la tswalo ya ka le ke le timele, le bosiu boo ka bona ho neng ho thwe: ‘Ho emotswe ngwana moshanyana!’

⁴ Tsatsi leo le ke le fetohe lefifi, Modimo ya hodimo a le lebale, sedi le se hlole le le tjhabela hape.

⁵ Le metswe ke fifi la bo-nka-ntjana, leru le aparele tsatsi leo, fifi le fifatse sedi la lona.

⁶ Bosiu boo bona bo fifalle ruri, bo se balellwe le matsatsi a selemo, bo se ballelwe le matsatsi a dikgwedi.

⁷ Ka boo bosiu ho se tswalwe lesea, le mehoo ya thabo e se utlwahale.

⁸ Barohaki ba matsatsi ba ke ba bo rohake, bona ba tsebang le ho tshwenya kganyapa.

⁹ Naledi di se ke tsa phatsima, bo batle lesedi, bo se le fumane, bo se ke ba bona ha tsatsi le tjhaba,

¹⁰ hobane ha bo a ka ba kwala mme popelo, ha bo a ka ba nthibela ho bona maswabi.”

Jobo o re hoja a se ke a tswalwa

¹¹ “Ke hobaneng ke sa shwelang popelong? Ke hobaneng ke sa shwang ha ke tswalwa?

¹² Ke hobaneng nkileng ka sikwa? Ke hobaneng ke antseng matswele?

¹³ Jwale nkabe ke rapame, ke kgutsitse, ke ithobaletse, ke phomotse ka kgotso,

¹⁴ ke phomotse le dikgosi le matona a kwano, bao mehaho ya bona e leng mabitla,

¹⁵ le mahosana a kgabang ka kgauta, ao matlo a wona a tletseng silefera;

¹⁶ ke epetswe jwaloka sefolotsana, jwaloka lesea le eso bone lesedi.

¹⁷ Lebitleng ba kgopo ba a kgaotsa, ba kgaotsa ho ferekanya, ba kgathetseng, teng ba fumana phomolo.

¹⁸ Ba thopilweng le bona ba phela ka kgotso, ha ba sa utlwa mokataki a kgarumaka.

¹⁹ Ba hlomphehang le ba eisehang ba a lekana, kgoba le holotswe kgobeng ba monga lona.”

Ba ditlokotsing ba labalabela lefu

²⁰ “Ba ditlokotsing ba bontshetswang lesedi? Ba tubehileng moyeng ba neelwang bophelo?

²¹ Ba labalabela lefu, ha le ba fihlele, ba le batla le ho feta letlotlo, patuwe.

²² Ba thaba ka thabo e fetisisang, ba nyakalle ha ba kena ka lebitleng.

²³ Ya fihlametsweng ke tsela o tswaletsweng, athe Modimo o mo raletse mathibela?

²⁴ Bakeng sa ho ja ke tlelwa ke mefehelo, medumaelo ya ka e phutsalle sa diphororo!

²⁵ Seo ke se tshabang se nkwetse hodimo, seo ke se tshohileng jwale se mphihletse.

²⁶ Ke hloka kgotso, ke hloka le boikgutso; ke hloka phomolo, tsietsi di nkapere!”