Jobo 28 - BIBELE

Motho o batla bohlale

¹ “Silefera e na le morafo wa yona, kgauta e na le setshekelo sa yona;

² tshepe yona e tjhekwa e etswa katlasa lefatshe, lethose le fumanwa ka ho qhibidisa moralla.

³ Motho o kenella hare mpeng ya lefatshe, a yo fihla kgotjheletsaneng tse hole, a etse merafo hara lefifi le letsholetsho.

⁴ O tjheka tjhafo hole le leaho la batho, bakeng tseo leoto le eso hate ho tsona; a leketle marapong a le hole le batho, a tsokotsehe, a ye kwana le kwana.

⁵ Dijo di mela kahodima lefatshe, katlase le fuduuwa jwalokaha ho fuduuwa mollo.

⁶ Majwe a lona a bopeletswe le disafire, a bile a na le mereto ya kgauta.

⁷ Tsela ya teng ha e tsejwe le ke letlaka, esita le phakwe ha e eso ka e e bona.

⁸ Batana tsa naha ha di eso tsamaye ho yona, esita le tau ha e eso fete le moo.

⁹ “Lejwe la moremaphofu motho o a le thuaka, thaba a di fure metheong ya tsona.

¹⁰ Hara mafika a phunyake mesele, mahlo a hae a bone tsa bohlokwa di le mefuta.

¹¹ Metsi a rothelang ka merafong o a a thibela, tse patehileng a di bee mmananeng, di bonwe ke bohle.”

Bohlale ha bo fumanwe

¹² “Ebe jwale bohlale re ka bo fumane kae? Lehae la kutlwisiso lona le fumanwa kae?

¹³ Bohlale ha bo fumanwe fatsheng la ba phelang, ha ho ya utlwisisang bohlokwa ba bona.

¹⁴ Bodiba bo re: ‘Ka ho nna bohlale ha bo yo!’ Lewatle le re: ‘Le ho nna bohlale ha bo yo!’

¹⁵ Ka kgauta e hlwekisitsweng bo ke ke ba rekwa, kapa theko ya bona ya methwa ka boima ba silefera.

¹⁶ Ka kgauta ya Ofire bo ke ke ba rekwa, kapa ka kareneleane le safire ya bohlokwa.

¹⁷ Kgauta kapa mahakwe a ke ke a lekana le bona, kapa ba ananngwa ka mekgabiso ya kgauta.

¹⁸ Dikgetla le mahakwe tsona ha di sa bolelwa; theko ya bohlale e feta le mabenyane a bohlokwa.

¹⁹ Jwe la bohlokwa la Kushe le ke ke la lekana le bona, ka kgauta e hlwekisitsweng bo ke ke ba rekwa.”

Bohlale bo tsejwa ke Modimo feela

²⁰ “Ebe jwale bohlale bo tswa hokae? Lehae la kutlwisiso lona le hokae?

²¹ Bo patetswe dibopuwa tsohle, bo patetswe le tsona nonyana tse fofang.

²² Timelo le lefu le tsona di re: ‘Re utlwa bo-fuufu ha ba bo bolela.’

²³ “Ke Modimo feela ya tsebang tsela ya bona, ke yena feela ya tsebang habo bohlale,

²⁴ hoba o bona pheletso tsa lefatshe, o bona tsohle tse tlasa mahodimo.

²⁵ Ha Modimo a nea moya matla a wona, le mawatle a a sehela moedi;

²⁶ ha a ne a beela pula taelo, lehadima le lona a le betlela tsela,

²⁷ o ila bona bohlale, a bo hlahloba, a bo leka, a bo ananela.

²⁸ “Yaba o re ho motho: ‘Ho tshaba Morena ke bona bohlale; ho furalla bokgopo ke yona kutlwisiso.’ ”