Jobo 26 - BIBELE

Jobo o bolela boholo ba Modimo

¹ Yaba Jobo o a araba, o re:

² “Wa tla wa thusa motho a fokola! Wa tla pholosa letsoho le fokola!

³ O eleditse sethoto hantle hakaakang! O bontshitse tsebo e kgolo hakaakang!

⁴ O rutilwe ke mang ho bua polelo tsee? Polelo tseo o di buang ke tsa mang?

⁵ “Ba ka mabitleng ba a thothomela, le tsohle tse tlasa metsi, tse phelang ho wona.

⁶ Nqalo ya Bafu e feela kapela Modimo, mohohlo wa timelo o ahlame, ha o a kwahelwa.

⁷ Modimo o sarolotse leboya hodima sepakapaka, a leketlisa lefatshe hodima bofeelafeelane.

⁸ O phuthetse metsi kahara maru a hae; ha ho leru le phatlolwang ke boima ba metsi!

⁹ Kgwedi ha e tolokile o a e fifatsa, ka maru a hae a e etsetse lesira.

¹⁰ O radile sedikadikwe, a se rala hodima lewatle, a etsa moedi ho arohanya lesedi le lefifi.

¹¹ Tshiya tsa lehodimo le tsona di a reketla, di reketla ke ho tshoha kgalemelo ya hae.

¹² Ka matla a hae lewatle a le tsosa maqhubu, ka bohlale ba hae a tamukanya Rahaba.

¹³ Ka moya wa hae a ntlafatsa mahodimo, ka tsoho la hae a hlaba noha e lelesela.

¹⁴ Tsena ke dinyane feela tsa matla a hae, tse bolelwang ka yena ke lehweshehweshe; boholo ba matla a hae bo ka utlwisiswa ke mang?”