Jobo 24 - BIBELE

Jobo o re Modimo ha a tsotelle bokgopo

¹ “Na Ya Matla wohle tsatsi la kahlolo ha a le tsebe? Ba mo sebeletsang nako ya lona ba a e tseba?

² “Ba kgopo ba suthisa mekolokotwane ya meedi, ba utswe mehlape, ba be ba e katle.

³ Tonki ya kgutsana ba e kgothela pele, pholo ya mohlolohadi ba e nkele peeletso.

⁴ Ba thesela bafumanehi hore ba suthe tseleng, mafutsana wohle a phela ka ho ipata.

⁵ “Jwaloka tonki e hlaha, lehwatateng, mafutsana a tsohella mosebetsing, ho ya sela, lefeella ke lona le fepang bana ba wona.

⁶ A kotula dijo masimong a ba kgopo. A kgwahlapise morara rapeng tsa ba kgopo.

⁷ A robala a le feela ke ho hloka kaparo, rame se fella hodima wona ke ho hlobola.

⁸ Mafutsana a kolobiswa ke medupe ya thaba, a be a maname mafikeng ke ho hloka lephephe.

⁹ “Kgutsana e hlothwa letsweleng, tsweleng la mma yona, mofutsana o lefa molato ka lesea la hae.

¹⁰ Ba tsamaisa mafutsana a se na le nketlana, a thotha dihlopha tsa koro a ntsa lapile,

¹¹ a tulela tholwana tsa mohlwaare matlapeng, a etsa ole, a tlhotla veine morareng a ntse a nyorilwe.

¹² Medumaelo ya ba shwang e utlwahala hara motse, ba tswileng dikotsi ba llela hore ba thuswe, empa thapelo tsa bona Modimo ha a di natse.

¹³ “Ho na le ba bang ba hloileng lesedi, ba sa tsebeng tsela tsa lona le ho tsamaya ka tsona.

¹⁴ Mmolai o tsoha ha mafube a hlaha, a bolaye mofumanehi, a bolaye le mofutsana; athe bosiu teng o fetoha leshodu hantle.

¹⁵ Sehlola se a lebella, se lebella hore shwalane e tshware, se re: ‘Ha nka ke ka bonwa ke ope,’ ebe jwale se ikwahela sefahleho.

¹⁶ Bosiu mashodu a thuakanya matlo, motsheare teng ebe a a ipata; lesedi lona ha a kopane le lona.

¹⁷ Ho wona wohle fifi le tshwana le motsheare, matshabeho a lefifi ho mashodu ke metswalle.

¹⁸ “Ba jwalo ba ka mahohodi a lwebang hodima metsi, masimo a bona a neilwe thohako, ha ho ya yang rapeng tsa bona tsa morara.

¹⁹ Jwalokaha komello le motjheso di qhibidisa lehlwa, lebitla le lona baetsadibe le a ba metsa.

²⁰ Popelo e tla ba lebala, diboko di ba nyabele; ba ke ke ba hlola ba sa hopolwa, bokgopo bo tla fela sa fate se robehile.

²¹ Mosadi wa nyopa ba a mo sotla, mohlolohadi yena ba mo hlokele mohau.

²² Ka matla a hae Modimo o lelefatsa bophelo, o lelefatsa bophelo ba bo-ramonatla, ba ka tsitsa, tshepa la ho phela lona ha le yo.

²³ O a ba sireletsa, ba be ba rue letshepa, athe metsamao ya bona yona o e disitse.

²⁴ Ba tuma ka nakwana, ba be ba nyamele, ba theolwe dikalaneng, ba timetswe jwaloka bohle, ba shwe sa diako tsa koro ha di kgaolwa.

²⁵ “Haeba ho se jwalo, nka shanofatswa ke mang? Ke mang ya ka reng polelo tsa ka ke tsa bosawana?”