Jobo 23 - BIBELE

Jobo o lakatsa ho ipuella ho Modimo

¹ Yaba Jobo o a araba, o re:

² “Le kajeno sello sa ka se sa le bohloko; le hoja ke bile ke fehelwa hakaalo, tsoho la Modimo le ntse le nkimetse.

³ Hoja ke a tseba hore na nka mo fumana kae, ke ne ke tla ema kapela setulo sa hae,

⁴ nyewe ya ka ke e rale kapela hae, ka ho tlala ke lokodise mabaka a ka.

⁵ Ke ne ke tla utlwa ha a nkaraba, ke utlwisise polelo tsa hae ho nna.

⁶ Na Modimo a ka ntshobokella ka bonatla ba hae? Le ho ka! a ka sekeha tsebe, a mmamela!

⁷ Ya lokileng a ka arabisana le yena moo; ho Moahlodi wa ka ke lokollelwe ruri.

⁸ “Ha ke eya botjhabela ha ke mo fumane, ha ke eya bophirima le teng ha ke mo fumane,

⁹ ha a le leboya ha ke mmone, ha a sebetsa borwa le teng ha ke mmone.

¹⁰ Empa Modimo o tseba metsamao ya ka; ha a nteka ke tla tswa ke hlwekile seka kgauta.

¹¹ Mehato ya ka e hodima mehato ya hae, ke tsamaile tseleng ya hae, ha ke a e kgeloha.

¹² Taelo tse tswang molomong wa hae ha ke a di kgeloha, ka pelong ya ka ke bolokile polelo tsa hae.

¹³ “Ha a rerile o rerile, a ka hanyetswa ke mang? O iketsetsa tsohle ka ho rata ha hae;

¹⁴ seo a se rerileng o se phetha ka nna, merero e kang ona e mengata ho yena,

¹⁵ ka baka leo ke tshaba ho ema kapele ho yena, ha ke mo hopola tswalo le a nkgekgetha.

¹⁶ Modimo o mphokodisitse, ke hloka sebete, Ya Matla wohle o nkgekgethisa letswalo;

¹⁷ empa lefifi le ke ke la nkgutsisa, fifi la bo-nka-ntjana le mphoufaditseng.”