Jobo 21 - BIBELE

Jobo o tiisa hore ba kgopo ba a atleha

¹ Empa Jobo a araba Sofara, a re:

² “Ako mamele puo ya ka, o e mamele ka hloko, ho mmamela hoo e be ho nketsetsa matshediso;

³ bea pelo, le nna ke bolele tsa ka, ha ke qetile ebe jwale o a ntshoma.

⁴ “Na ebe ke ipelaetsa ho motho? ho hloka mamello ebe ha ke ho lokele?

⁵ Ntadimeng, le tswe le makala, le thibe melomo ka matsoho a lona.

⁶ Tsena ha ke di hopola ke a nyaroha, mmele wa ka wohle o a thothomela.

⁷ “Ke hobaneng ha ba kgopo ba phela, ba tsofala, ba bile ba matlafala?

⁸ Ba bona bana ba bona ba hola, ba bile ba atleha, le tloholo tsa bona ba be ba di bone.

⁹ Malapa a bona a na le kgotso, a hloka tshabo, kotlo ya Modimo ha e eso ba wele hodimo.

¹⁰ Poho ya ya kgopo e a katika, ha e ke e lala, thole tsa hae di a tswala, ha di ke di folotsa.

¹¹ Bashanyana ba bona ha ba etswa e ka re mohlape, bana ba bona ba a tlola, ba a thalaka.

¹² Ba bina melodi ka moropa le ka harepa, ba thabela ho utlwa modumo wa lekodilo.

¹³ Bophelo ba bona ba bo qeta ba atlehile, hanghang ba theohele Nqalong ya Bafu.

¹⁴ Feela ba re ho Modimo: ‘Re hlokomolohe! Ha re lakatse ho tseba ditsela tsa hao!

¹⁵ Ya Matla wohle re ka mo sebeletsa ha e le mang? Ho mo rapela ebe ho ka re putsa ka eng?’

¹⁶ Feela katleho ya bona ha e laolwe ke bona; nna ke thoko le dikeletso, keletso tsa ba kgopo.

¹⁷ “Le tingwa hakae lebone la ba kgopo? Koduwa yona e ba wela hodimo hakae, ha Modimo a aba dikotlo a halefile?

¹⁸ Ke hakae ba kang dirite ha moya o pepetla, ba kang mmoko ha sefefo se o fefera?

¹⁹ Modimo o isa kotlo tsa motho baneng ba hae; eka a ka be a otla yena mo-di-etsi, a mo otle le yena a tla ikutlwele.

²⁰ Kotlo eo e mo tlele a e shebile, kgalefo ya Ya Matla wohle a e habole;

²¹ hoba palo ya kgwedi tsa hae ha e fedile, boiketlo ba lapa la hae ha a sa bo natsa.

²² Ke mang ya ka rutang Modimo bohlale, athe Modimo o ahlola le ba lehodimo?

²³ “E mong motho o shwa e le sekwankwetla, a kgotsofetse, a bile a iketlile;

²⁴ mmele wa hae o shahlile, o fepehile, moko o tiile ka masapong a hae;

²⁵ e mong o shwa a hlorile moyeng, le boiketlo a sa ka ba bo tseba;

²⁶ ba robala ba bapile roleng la lebitla, bobedi ba bona ba nyeunye diboko.

²⁷ “Ke tseba ya lona mehopolo, le mano ao le ntherelang wona ke a a tseba.

²⁸ Le ntse le re: ‘Lapa la sekwele jwale le kae? Malapa a ba kgopo wona a kae?’

²⁹ Ha le eso botse bo-mafeta-ka-tsela? Polelo tsa bona ha le di natse, ha ba re:

³⁰ ‘Ha koduwa e etla ya kgopo o a pholoswa, tsatsi la kgalefo le lona o a le phemiswa?’

³¹ Ya ka mo nyatsang sefahlamahlo ke mang? Ketso tsa hae tsona a ka di ahlolelwa ke mang?

³² Empa o a nkwa, a iswe lebitleng, bitla la hae le lebelwe ka thata.

³³ Qubu ya mobu e hodima hae ha e mo imele, batho bohle ba koloka kamora hae, kapele ho yena boiyane bo mo eteletse pele.

³⁴ “Mafeela a lona a ka ntshedisa jwang? Karabo tsa lona di tletse thetso!”