Jobo 20 - BIBELE

Sofara a hlalosa kabelo ya ba kgopo

¹ Yaba Sofara ya tswang Naama o a araba, o re:

² “Ka baka la lehala le ka pelong ya ka, menahano ya ka e re ke o arabe.

³ Ke utlwa kgalemelo e ntshwenyang maikutlo, moya wa ka o nthuta hore ke e arabe.

⁴ “Ha ke re o a tseba, ho tloha boholoholo, ho tloha ha lefatsheng mona ho bewa motho:

⁵ Modidietsane wa ba kgopo o sekgwahla, mokoka ha o yo, thabo ya baetsadibe ke ya motsotswana feela?

⁶ Leha boikgantsho ba hae bo ka fihla mahodimong, hlooho ya hae ya ithwesa tlokola ya maru,

⁷ o tla timella ruri jwaloka thete la hae, ba mmoneng ba re: ‘Ekaba o nyametse kae?’

⁸ O tla fela sa toro, a se hlole a fumanwa; jwaloka pono ya bosiu a nyamele.

⁹ Leihlo le mo itseng hedi! le ke se mmone hape; le tulo tsa hae di ke ke tsa hlola di sa mmona.

¹⁰ Bara ba hae ba qekisa ho ratwa ke mafutsana, ba buseletsa mafutsana qhoqha ya ntata bona.

¹¹ Bokwakwariri ba botjha bo tletse masapo a hae, ha a kgutlela leroleng bo tla lala le yena teng.

¹² “Le hoja bokgopo bo mo natefela lehano, a bile a bo pata tlasa leleme la hae;

¹³ a sa ikutlwe ho ka kgaohana le bona, a bo moma, a bo boloka ka hanong la hae;

¹⁴ dijo tseo di a hlasa ha di fihla ka mohodung, di iphetole mahloko a bo-marabe.

¹⁵ Menono o a e metsa, o bile o a e hlatsa, Modimo o a mo hlatsisa, o kgofa mohodu wa hae.

¹⁶ O tla mokonyetsa bohloko ba bo-marabe, dikwetsepe tsa qowane tsona di mmolaye.

¹⁷ Dinoka a ke ke a hlola a sa di bona, le phororo tse phallang tsa dinotshi le tsa lebese.

¹⁸ Tsa matsoho a hae o di busetsa a so di latswe, tse tswalwang ke kgwebo le tsona ha di mo thabise.

¹⁹ O tubile mafutsana, a a siya a itlhophere, a ikgapela matlo e se a matsoho a hae.

²⁰ “Ha a na ho fuwa tsweya ke takatso tsa hae, a ke ke a ipholosa le ka maruo a hae.

²¹ Meharo ya hae ha e a siya le pala, boiketlo ba hae ke ba nakwana;

²² o tla tsieleha a ntsa hafa ka nkatana, mafutsana a wele ka sekgahla, a wele hodima hae.

²³ Etlare hoja a kgotshe sa mpana-phatloha, kgalefo ya Modimo e mo tlokomele malakabe, thala la metsu le mo lethehele hodimo.

²⁴ Leha a ka ba a phonyoha lerumo la tshepe, seqha sa lethose sona se tla mo fula,

²⁵ motsu wa sona o yo phunyeletsa mokokotlo, ntlha ya wona e phatsimang e qhale nyooko, matshabeho a lefu a mo aparele kahohle.

²⁶ Fifi la bo-nka-ntjana le mo laletse, o tla timetswa ke mollo o se na sebutswelo, ba setseng lapeng la hae ba tamukane.

²⁷ Mahodimo a tla talola bokgopo ba hae, lefatshe le eme ka maoto ho mo qosa.

²⁸ Ntlo ya hae e tla hoholwa ke sekgohola, ke phororo tsa kgalefo ya Modimo ha e tlokoma.

²⁹ Ona ke wona moputso wa ya kgopo, lefa leo a le abetsweng ke Modimo.”