Jobo 19 - BIBELE

Jobo o dumela hore Modimo o tla mo pakela

¹ Jobo a boela a araba, a re:

² “Ebe le tla nlhokofatsa halelele hakae, le ntshithabetse ka dipolelo ho fihlela neng?

³ Ke ka makgetlokgetlo le nnyahanya, le sa hlajwe ke dihlong ho nnyefola;

⁴ haeba ke nnete, ke entse phoso, phoso eo ke ya ka, ha e le ame ka letho.

⁵ Haeba le iphahamisetsa kahodimo ho nna, le nqosa ka baka la tlokotsi ena ya ka;

⁶ jwale tsebang: Modimo ke yena ya nkentseng hampe, o ntanteletse ka letlowa la hae.

⁷ Ha ke howa, ke re: ‘Bosoro!’ ha ke arabelwe! Ke howa haholo, empa toka ha e eo!

⁸ “O tinkeditse tsela, ke sitwa ho feta; tselana tsa ka di aparetswe ke lefifi.

⁹ O nkamohile boitlhompho ba ka, o nthodisitse le mofapahlooho,

¹⁰ o ntlepola kahohle, mme ke a ikela, tshepo ka ya o e fothotse seka sefate.

¹¹ Ke tlokomelwa ke kgalefo ya hae, yena o ntadima ke le sera sa hae;

¹² ke futuhetswe ke mabotho a hae, a hlomme diahelo ho potapota lapa la ka.

¹³ “Modimo o entse hore bana beso ba nkwekwetle, metswalle le yona e mphuralle ho qeta.

¹⁴ Bahaeso le bona ba se ba ntahlile, balekane ba ka ba se ba ntebetse.

¹⁵ Ho baeti le makgabunyane a lapa la ka, ke tadingwa ke le moeti, ke le molata.

¹⁶ Ha ke bitsa mohlanka wa ka ha a arabele, esita leha ke ipiletsa ho yena.

¹⁷ Mohatsa ka o nkgelwa ke moya wa ka, bana beso le bona ba a nnyonya;

¹⁸ diratha le tsona di a nnyedisa, ha ke hlaha eba di a ntlaka.

¹⁹ Ba ntshanang se inong le nna ba a nnyonya, ke furaletswe le ke baratuwa ba ka.

²⁰ Ke moote, ke manne, o ka mpala dikgopo, ke phonyohile feela ka la mohaswa lesoba.

²¹ “Nkgauheleng! Nkgauheleng! lona metswalle ya ka! ke otlilwe ke Modimo ka tsoho la hae!

²² Le ntlhorisetsang jwalokaha Modimo a ntlhorisa? Ha le kgotsofale ha ke hlepholeha dinama?

²³ “Polelo tsena tsa ka eka di ka be di ngolwa, eka di ka be di ngolwa, di etswa buka,

²⁴ di ngolwa ka pene ya tshepe tlapeng la loto, di ngolwa lefikeng, di hlole kamehla yohle!

²⁵ “Ke a tseba: Mopholosi wa ka o a phela, qetellong o tla ema a mpakele.

²⁶ Leha tlalo la ka le tla be se le bodile, ka mahlo Modimo ke tla mmona ke se mmeleng ona;

²⁷ ke yena eo ke tla fela ke mmone ka seqo, ke mmone ka mahlo a ka ke sa romeletsa. Ka pelo ya ka yohle ke labalabela hoo!

²⁸ “Haeba le ka re: ‘Re sa tla mo hlorisa, hobane sesosa sa taba se ka pelong ya hae!’

²⁹ Lona, ka bolona, le hle le tshabe sabole, hoba sebe sa kgalefo, kotlo ya sona ke sabole, le tle le tsebe hore efela kahlolo e teng.”