Jobo 18 - BIBELE

Biledade o hlalosa pheletso ya ba kgopo

¹ Yaba Biledade ya tswang Shua o a araba, o re:

² “Ho shwahla ha hao ho tla kgaotsa neng? Imamele pele, re ntano buisana!

³ O re tadimelang jwaloka diphoofolo? Mahlong a hao re le mahelehele?

⁴ Kgalefo ya hao e o entse maharola! O re fatshe le furallwe ka baka la hao? Mafika a suthiswe tulong tsa wona?

⁵ “Bone la ya kgopo ke lona le tla tingwa; tlhase ya mollo wa hae e ke ke be ya hotela.

⁶ Ka lapeng la hae sedi le tla fifala, bone la hae lona le time.

⁷ Mehato ya hae e hwantang e tla therekela, a kudupanngwe fatshe ke masene a hae.

⁸ Maoto a hae a mo akgela ka letloweng, o ntsa itsamaela hodima leraba;

⁹ sefi se tla kgata serethe sa hae, letlowa le mo tshwase, le mo harele;

¹⁰ mobung ba mo patetse sekgoqetsane, tseleng ya hae ba mo tjhehetse sefi.

¹¹ Matshabeho a lefu a mo tshosa kahohle, hohle moo a yang teng a mo salame.

¹² Tlala e fedisa matla a hae, a fokole, hang ha a hloleha koduwa e mo wela hodimo.

¹³ Bolwetse bo mo natholotsa letlalo, ditho tsa hae di jewa ke lefu le tshabehang.

¹⁴ Boiketlong ba lapa la hae o a thakgolwa, o kgothelwa pele ho ya ho kgosi ya matshabeho;

¹⁵ lapeng la hae ho tla nonotswa ka sebabole, basele ba tle ba phele ka ho lona.

¹⁶ Metso ya hae e omellela mobung, kahodimo mahaba a hae wona a be a pone.

¹⁷ Hohle lefatsheng o a lebalwa, diterateng ha ho sa buuwa ka lebitso la hae,

¹⁸ o lelekwa leseding, a iswe lefifing, hohle lefatsheng ebe o a falatswa.

¹⁹ Tjhabeng sa habo ha a na ngwana, leha e le setloholo, lapeng la hae ha ho a sala le thokolwana.

²⁰ Meloko e mo hlahlamang e tla tshoswa ke pheletso ya hae, e boneng ka mahlo yona e tshwarwe ke thothomelo.

²¹ Ona ke mokgwa wa ho fela ha lapa la ya kgopo, le jwalo lehae la ya sa natseng Modimo.”