Jobo 17 - BIBELE

¹ “Moya wa ka o tetebetse, matsatsi a ka a kgutsufetse, bitla le lona le nkemetse.

² Basomi ba mpotapotile, mahlo a ka a tadimile bora ba bona.

³ “Nkgolwe, Modimo, ke bua nnete, ha ho na e mong ya ka mpakelang;

⁴ kelello tsa bona o di thithibantse, kahoo o se ka ba ba thusa, ba hlola.

⁵ Ya ekang motswalle ho fumana moputso, bana ba hae ba tla lebella mahlo a ba kgathale.

⁶ “Ho bohle ke se ke fetohile sesomo, fahleho sa ka ba se tshwela ka mathe;

⁷ mahlo a ka a fifaditswe ke maswabi, ditho tsa ka tsohle e se e ka seriti.

⁸ Hona batho ba lokileng ba ho makaletse, ba se nang molato ba nyatsa ba kgopo;

⁹ ya lokileng o tla tiisetsa tseleng ya hae, ya matsoho a hlwekileng a nne a matlafale.”

Jobo a lakatsa eka a ka shwa

¹⁰ “Lona bohle boelang le leke hape! Feela hara lona ha ke bone mohlalefi.

¹¹ Matsatsi a ka a fetile, merero ya ka e nyopile; takatso tsa pelo ya ka le tsona di nyopile.

¹² Bosiu ba bo fetola motsheare, ha ho le lefifi ba re: ‘Sedi le haufi!’

¹³ Haeba hae la ka ke Nqalo ya Bafu, eba phate tsa ka ke di ala lefifing;

¹⁴ haeba ke re ho lebitla: ‘Ke wena ntate,’ ho seboko ke re: ‘O mme, o kgaitsedi,’

¹⁵ ebe jwale tshepo ya ka e tla ba kae? ebe ke mang ya tla e bona?

¹⁶ E tla theohela le nna lebitleng, e theohele le nna leroleng.”