Jobo 16 - BIBELE

Jobo o re o hloilwe ke Modimo le batho

¹ Yaba Jobo o a araba, o re:

² “Tse kang tsena ke di utlwile hangata; lona bohle le batshedisi ba tenang motho!

³ Na o sa tla kgaotsa ho shwahla mafeela? Sesosa sa nganga ya hao ke sefe?

⁴ Hoja boemo ba ka e ne le ba lona, ke ne nka nna ka bua jwaloka lona, ka puo tse ngata ka le tlameletsa, ka ba ka thukuthela hlooho ya ka ho lona.

⁵ Empa polelo tsa ka di ne di tla le kgothatsa, ho bebenya melomo ha ka ho le bebolele tlokotsi.

⁶ “Leha nka bua, bohloko ba ka ha bo kokobele; leha ke kgutsitse, bona ha bo ntlohele.

⁷ Oho, Modimo, o fela o ntshotlile, lapa la ka lohle le timeditswe ke wena;

⁸ o ile wa ntlhasinya, mme o sera sa ka; bokojwane ba ka ke paki e nqosang ke e shebile.

⁹ Ya ntlhoileng, ka kgalefo o a ntlepolaka, o ntsikitlanyetsa meno a hae; sera sa ka se ntjheba ka mahlo a ntjhotjho!

¹⁰ Batho ha ba kopetse melomo ha ba ntshoma, ba ntjabela lerameng ba bile ba nnyefola, ba entse setha-se-wele hodima ka.

¹¹ Modimo o nneeletse ka balotsana, o ntahletse matsohong a batho ba kgopo.

¹² Ke ne ke iketlile, ke mona o ntshuhlamantse, a mphamola ka molalana, yaba o a mpidila, a ntlhoma ho ba sekgopi sa metsu ya hae.

¹³ Metsu ya hae e nketseditse lethala, o harola dikahare tsa ka a se na mohau, nyooko ya ka yona o e qhalanyetsa fatshe.

¹⁴ O ntlhaba a sa tswa ntlhaba, o nkgorohela jwaloka seqhobane.

¹⁵ “Mmeleng wa ka ke apere tse mahwashe, ka phatla ya ka leroleng ka sunyama;

¹⁶ mahlo a ka a fubetse ke menyepetsi, botsho bo entse sedika-mahlwana ntshing tsa ka;

¹⁷ leha matsoho a ka a sa fuparela bokgopo, le thapelo ya ka ho Modimo e hlwekile.”

Jobo o ipiletsa ho Modimo hape

¹⁸ “Oho, wena lefatshe, madi a ka o se ke wa a monya, boipiletso ba ka bo se ke ba kgaotsa!

¹⁹ Le jwale paki ya ka e lehodimong, mmuelli wa ka le yena o hodimodimo.

²⁰ Ha e le metswalle ya ka e a ntshoma, keledi tsa ka di keleketlela ho Modimo.

²¹ Ke mang ya ka mpuellang ho Modimo jwalokaha ho buellwa motho ho motswalle?

²² “Ho tla feta lemo di le mmalwana, ebe nna ke nka tsela e yang bo-ya-batho.”