Jobo 15 - BIBELE

Elefase o re Jobo ha a hlomphe Modimo

¹ Yaba Elefase ya tswang Temana o a araba, o re:

² “Na mohlalefi a ka bebera manenekwane, a pipitlelwa ke moya wa ho phorohla?

³ A phea kgang ka ho bua mafeelafeelane, kapa ka puo tsa sa thuseng letho?

⁴ Ho tshaba Modimo o ho phephethetse hole le wena, ho rapela Modimo hona o a ho fedisa.

⁵ Puo tsa hao di susumetswa ke bokgopo ba hao, boqhweleqhwele bo ntlheng ya leleme la hao.

⁶ Ha o tsuwe ke nna, o tsuwa ke dipuo tsa hao, molomo wa hao ke wona pakimotshwaedi.

⁷ “Ebe ke wena motswalwapele wa motho? kapa o bopilwe pele ho maralla?

⁸ Na merero ya phiri tsa Modimo o a e tseba? Na bohlale bona ebe ke ba hao o le inotshi?

⁹ O tseba dife tseo re se nang tsebo ya tsona? O utlwisisa dife tseo re se nang kutlwisiso ya tsona?

¹⁰ Bo-raputswe le maqheku ba ka hlakoreng la rona, bannabaholo ba boneng letsatsi pele ho ntatao.

¹¹ “Na matshediso a Modimo o a a halala, le mantswe a buuwang ka bonolo tsebeng tsa hao?

¹² O dumellang ho rwalwa ke pelo ya hao? Mahlo a hao wona a tukelang malakabe,

¹³ hoo o hlatsetsang kgalefo ya hao ho Modimo, o buang puo tse tjee, ka molomo wa hao?

¹⁴ “Motho ke ntho nngwe, hoo a ka bang le tlhweko? Ya tswetsweng ke mosadi yena a ka loka jwang?

¹⁵ Haesita Modimo a sa tshepe mangeloi a hae, mahlong a hae le mahodimo a sa hlweka,

¹⁶ a ka tshepa motho jwang, a le manyala, a tletse podile, a momorotsa bokgopo sa metsi a mophoko?”

Qetello ya ba kgopo e a tshabeha

¹⁷ “Thea tsebe, o mamele, ke o manollele, ke o bolelle tseo ke di boneng ka mahlo a ka;

¹⁸ tse boletsweng ke banna ba bahlalefi, ba di bolela ba sa pate letho, ba bolela tseo ba di utlwileng, ho baholoholo ba bona;

¹⁹ bona bao naha e neng e abelwe bona feela, ho se molata o jakileng hara bona.

²⁰ “Ya kgopo o kgwebethwa ke letswalo, le mo kgwebetha ka tshiu tsohle tsa hae, mohatelli le yena le a mo kgwebetha, le mo kgwebethe ka lemo tsohle tsa bophelo ba hae.

²¹ Tsebe tsa hae di tlala medumo e tshosang, haeka tsohle di ya hantle batupi ba mo hlasele.

²² O lahlehetswe ke tshepo ya ho tswa kahara lefifi, kaekae sabole le yona e mo laletse.

²³ O lelera le naha, a batla dijo, a ntse a botsa hore na di kae; o a tseba, tsatsi la timelo ya hae le atametse;

²⁴ matshwenyeho le mahloko a mo kenya letswalo, a mo pupetsa sa kgosi e kgatheng la ho futuha,

²⁵ hoba o kokoseditse Modimo letsoho, o iketsa senatla ho Ya Matla wohle.

²⁶ O mo kgorohela a sataladitse molala, thebe e shahlileng a e utlile ka mallela.

²⁷ “Le hoja a le fahleho se matlebele, theka la hae le le maphethephethe,

²⁸ o tla phela metseng e le dithako, matlung a seng a setse a le feela, a kgatheng la ho fetoha masupi.

²⁹ Ha a ka ke a hlola a ba a rua, matlotlo a hae wohle a tla timela, fatshe le ke ke la anelwa ke maruo a hae.

³⁰ A ke ke be a phonyoha lefifing, lakabe le tla tjhesa mahlaku a hae, kgalefo ya Modimo e mo timetse!

³¹ A se ithetse ka ho tshepa mafeela, hobane mafeela e tla ba wona moputso wa hae.

³² Pele a eshwa hoo ho tla etsahala, makala a hae a ke ke be a tlokoma.

³³ O tla tshwana le morara, o hlohlorang tholwana di sa le tala, jwaloka mohlwaare o hlohlorang, o hlohlorang thunthung tsa wona.

³⁴ “Ba kgopo ba ke ke ba ba le ditloholo, mollo o tla tjhesa matlo a ba phelang ka tjotjo.

³⁵ Ba emola tlokotsi, ba tswale bokgopo, thetso ke yona ngwana popelo ya bona.”