Jobo 12 - BIBELE

Jobo o re o ahlolwa ka phoso

¹ Jwale Jobo a araba, a re:

² “Ha ho pelaelo, batho ke lona feela! Bohlale bo tla ya le lona lebitleng.

³ Le nna ke na le kelello jwaloka lona, etswe le hona ha le mphete ka letho; ke mang ya sa tsebeng dintho tsee tsohle?

⁴ Kajeno ke fetohile sesomo ho metswalle, ke fetohile sesomo ke lokile, ke se na kodi, nna ya neng a ipiletsa ho Modimo, a nkarabe.

⁵ Ba iketlileng ba nyedisa bomadimabe, ba re ke pheletso ya ba kgatheng la ho thella.

⁶ Malapeng a batupi teng ho rena kgotso, ba phephetsang Modimo ba phela ka boiketlo, bao matla a bona e leng wona modimo wa bona.

⁷ “Ako botse diphoofolo, tsona di tla o ruta, nonyana tsa lehodimo le tsona di o kaele;

⁸ o bue le lefatshe le tle le o rupele, le tlhapi tsa lewatle di ke di o qoqele.

⁹ Ke efe ho tsona tsohle e hlokang tsebo ya hore Morena o entse tsohle ka letsoho la hae?

¹⁰ Bophelo ba sebopuwa ka seng bo matsohong a hae le meya ya batho bohle e phela ka yena.

¹¹ Ha ke re tsebe e mamela ho kgetha mantswe, jwalokaha leleme le kgetha dijo ka ho di latswa?

¹² Bohlale ba sebele bo hahetse ho bo-raputswe, ho phela halelele ho fana ka kutlwisiso.

¹³ “Empa bohlale le matla tsona ke tsa Modimo, ke yena monga kelello le kutlwisiso;

¹⁴ moo a heleditseng ho ke ke ha tsoswa marako, eo a mo kentseng tjhankaneng a ke ke a lopollwa.

¹⁵ Ha a thibela pula, metsi a pshela ruri, ha a nesa ya ditlwebelele, fatshe lohle le a senyeha.

¹⁶ Matla le bohlale ba sebele ke tsa hae; mothetsi le mothetsuwa ba matleng a hae.

¹⁷ Baeletsi o ba tlosa ba se na le nketlana, baahlodi bona a ba fetole ditsheretshere!

¹⁸ O lokolla mahlaahlela a dikgosi a bohatelli, mathekeng a tsona a kgaole maqhama a puso;

¹⁹ baprista o ba tlosa ba se na le nketlana, dinatla tsona a di theole tulong tsa tsona;

²⁰ baeletsi ba mmakgonthe a ba fetole dimumu, maqheku wona a a amohe meelelo.

²¹ O soma mahosana, a a teole, a kokobetse boikalatiso ba mahosana;

²² a senole le diphiri tsa mafifing, meriti e metsho a e tjhabisetse lesedi.

²³ O hodisa ditjhaba a be a di timetse, a di anafatse, a be a di hasanye;

²⁴ babusi ba ditjhaba a ba amohe meelelo, a ba lelerise mahwatateng ho se na tsela,

²⁵ ba phopholetse lefifing ho se lesedi, a ba thekesedise sa mahlena a bo habotse.”