Jobo 10 - BIBELE

Jobo o re na Modimo o mo sotlelang

¹ “Bophelo bona ba ka bo ntenne, kahoo ke tla boledisa tsa ka dipelaelo, ke bue moya wa ka o tubehile.

² Ke tla re ho Modimo: ‘Se ke be wa nkahlola; mpolelle tseo o nqosang ka tsona.

³ O bona ho le molemo ho nna o nkataka, o nyedisa mmopo wa matsoho a hao, o thabela merero ya ba kgopo?

⁴ Na o na le mahlo a nama? Na o bona jwalokaha batho ba bona?

⁵ Na tshiu tsa hao di tshwana le tshiu tsa batho? Na ngwaha tsa hao di tshwana le ngwaha tsa batho?

⁶ Ha e le moo o tswile bosele ho tsoma bokgopo ba ka, o batla, o batlisisa le sebe sa ka?

⁷ Wena o a tseba ho nna bokgopo ha bo yo, mme ha ho ya ka ntopollang matsohong a hao.

⁸ “ ‘Kahohlehohle ke bopilwe ke matsoho a hao, empa jwale ke se ke timetswa ke wena!

⁹ Ako hopole, o mpopile seka letsopa; na o tla nkgutlisetsa leroleng hape?

¹⁰ Na ha o a nqhatsa jwalokaha ho qhatswa lebese, wa mphehla jwalokaha leokwana le fehlwa?

¹¹ Wa nkapesa ka letlalo le ka dinama, wa ntlamahanya ka masapo le ka mesifa?

¹² O nneile bophelo, wa ba wa nnea lerato, wa mpoloka, wa baballa le moya wa ka.

¹³ “ ‘Tsena e ne le kunutu la pelo ya hao, ke a tseba, tsena e ne le morero wa hao:

¹⁴ Ha ke etsa sebe o ntadima ka le ntjhotjho, o ke ke wa ntokolla molatong wa ka.

¹⁵ Haeba ke molato bomadimabe ke ba ka! Leha ke se molato nke ke ka tadima motho, ke hlajwa ke dihlong ke lweba ka hara tlokotsi.

¹⁶ Ha hlooho ya ka e phahama o tla ntsoma jwaloka tau, o ntlhokofatsa ka ho nketsetsa dimakatso.

¹⁷ O tlisa paki tse ntjha ho nnyopisetsa bopaki, le kgalefo ya hao e ntlokomela ho feta, mara a hao a mphutuhela ka mekgahlelo.

¹⁸ “ ‘Ke hobaneng o entseng hore ke tswalwe? Eka nkabe ke shwele ke eso bonwe ke motho!

¹⁹ Eka nkabe ke sa ka ka ba ka tswalwa, kapa ka iswa lebitleng ha ke qeta ho tswalwa!

²⁰ Tshiu tsa ka di kgutshwanyane, di a feta; ako ntlohele, ke re kgefu! ho se hokae,

²¹ ke eso ikele kwana bo-ya-batho, fatsheng le lefifi, le meriti e metsho;

²² fatsheng le lefifi la bo-nka-ntjana, moo e leng lapeng habo morusu, moo sedi la teng e leng lefifi!’ ”