Isaia 40 - BIBELE

Tjhaba sa Modimo se a tshediswa

¹ “Tshedisang setjhaba sa ka, se tshediseng,” ho rialo Morena.

² Kgothatsang Jerusalema ka lerato, e bolelleng: Bokgoba ba yona bo fedile, sebe sa yona se tshwaretswe, Morena o e otletse sona haholo.

³ Lentswe la ya howang, le re: “Lokisang mmila wa Morena, le o lokise felleng, le otlollele Modimo wa rona mmila lehwatateng.

⁴ Dikgohlo tsohle di tla katwa, dithaba le maralla di bothalatswe, le tsona ditutudu di bothalatswe, baka tse makukuno di batalatswe.

⁵ Tlotla ya Morena e tla bonahatswa, batho bohle ba tla e boha ba le mmoho, hoba Morena o boletse jwalo.”

⁶ Lentswe le ile la re: “Howa!” Yaba nna ke re: “Ke tla howa ke reng?” Ere: “Batho bohle ba jwaloka jwang, tlotla ya bona e ka ya palesa tsa naha.

⁷ Jwang bo a pona, palesa di foforehe, ha moya wa Morena o fokela ho tsona. Ruri batho ba jwaloka jwang.

⁸ Jwang bo a pona, palesa di foforehe, empa ntswe la Modimo wa rona le hlola kamehla.”

⁹ Wena Sione, ya tlisang molaetsa o molemo, nyolohela thabeng e phahameng. Wena Jerusalema, ya tlisang molaetsa o molemo, howeletsa haholo o se na tshabo. Bolella metse ya Juda, o re: “Bonang, Modimo wa lona ke enwa!”

¹⁰ Bonang, Morena Modimo o tla e le Ya Matla, o tla busa ka letsoho la hae. Bonang, o tla le moputso wa hae, phetetso ya hae e mo eteletse pele.

¹¹ O katla mohlape wa hae jwaloka modisa, dikonyana o di sika ka matsoho a hae, a di sikele sefubeng sa hae, ditswetse tsona a di kganne hantle.

Ha ho Modimo ya kang wa Iseraele

¹² Ya kila metha metsi a lewatle ke mang, a a metha ka seatla sa hae? Ya kila seha moedi wa mahodimo ke mang, a o seha ka seatla sa hae? Ya kila kga role la lefatshe ka sethoto ke mang? Ya kila bea dithaba le maralla, a di bea sekaleng, ke mang?

¹³ Ya kila ruta Moya wa Morena ke mang? Ya kila mo ruta e le moeletsi wa hae ke mang?

¹⁴ Morena o kopile mang hore a mo eletse? Ho ahlola ka toka a ho rutwa ke mang? Tsebo yona a e rutwa ke mang? Tsela ya kutlwisiso a e bontshwa ke mang?

¹⁵ Ruri tjhaba di ka lerothodi rothodi la metsi ka nkgong, di ka lerolenyana ha le le sekaleng; ho yena boima ba dihlekehleke bo ka lerolenyana.

¹⁶ Fate tsa Lebanone ha di lekane ho besa, ho besa mollo aletareng, phoofolo tsa teng ha di lekane ho etsa setjheso.

¹⁷ Tjhaba tsohle ke lefeela ho yena, o di tadima e le mafeela a se nang thuso.

¹⁸ Jwale Modimo le ka mo lekanya le mang? Hona le ka re o tshwana le mang?

¹⁹ Setsebi se etsa setshwantsho sa modimo wa bohata, ebe lelala le se maneha kgauta, le se etsetse ketane tsa silefera.

²⁰ Mofutsana ya sitwang ho etsa nyehelo e jwalo, o kgetha sefate se ke keng sa ba sa bola; a batle setsebihadi sa mohlalefi ho mo etsetsa setshwantsho sa modimo wa bohata, se ke keng sa wa.

²¹ Na ha le tsebe, kapa ha le eso utlwe? Ha le a ka la tsebiswa ho tloha tshimolohong? Ha le eso utlwisise haesale lefatshe le thewa?

²² Modimo o dutse teroneng kahodima lefatshe, baahi ba lona ba tshwana le mehlwanyane. Mahodimo o a sarolotse jwalokaha eka ke lesira, a a ala sa tente eo ho phelwang ho yona.

²³ Mahosana o a etsa mafeelafeelane, babusi ba fatshe lena a ba fetole lefeela.

²⁴ Ba jwaloka sethopo se qetang ho hlongwa, seo metso ya sona e eso ka e tiya; ha moya wa Modimo o foka se ye se pone, setsokotsane se se fefole jwalokaha eka ke mmoko.

²⁵ “Jwale le ka ntekanya le mang? La re thaka ka yena ke mang?” ho rialo Ya Halalelang.

²⁶ Lelalang, le tadime mahodimo: Tseo le di bonang di bopilwe ke mang? Ke ya balang naledi tsa lehodimo a di bale ka bomong, lebotho ka leng a le bitse ka lebitso la lona? Ka baka la matla a hae a maholo, le ka baka la bonatla ba hae, ha ho le le leng le lahlehang.

²⁷ Wena Jakobo, o leng Iseraele, ke hobaneng ha o bua, o re: “Metsamao ya ka Morena ha a e tsebe, Modimo wa ka ha a natse tokelo ya ka?”

²⁸ Na ha le tsebe, kapa ha le eso utlwe? Morena ke Modimo wa kamehla yohle, ke yena Mmopi wa lefatshe lohle. A ke ke a kgathala kapa a tepella, mehopolo ya hae e ke ke be ya fihlelwa.

²⁹ O matlafatsa ba tepeletseng, ba kgathetseng o ba tsosa molota.

³⁰ Batjha ba a kgathala, mme ba tepelle, bahlankana ba kgothometsehe, ba be ba we;

³¹ empa ba tshepileng Morena ba tla tsoha molota, ba fofele hodimo jwaloka ntsu; ba tla matha, empa ba ke ke ba kgathala, ba tsamaye, ba se ke ba fellwa ke matla.