Isaia 32 - BIBELE

Mmuso wa toka

¹ Bonang, kgosi e tla busa e buse ka ho loka, mahosana a yona a buse ka toka.

² Kgosi ka nngwe e tla ka lephephe ha moya o puka, e ke setshabelo nakong ya sefefo, e ke nokana tsa metsi lehwatateng, e ke moriti wa lefika naheng e omeletseng.

³ Mahlo a ba bonang a ke ke a fifala, tsebe tsa ba utlwang di tla mamela.

⁴ Ba kelello di tatang ba tla tseba, ba utlwisise, maleme a mahwelea a rarolohe, a bue hantle.

⁵ Sethoto se ke ke sa hlola se bitswa kgosana, kapa senokwane sa hlompheha haholo;

⁶ hobane sethoto se bua bothoto, le ho nahana se nahana tse kgopo: Se etsa tse kgopo, se bua tsa bohata ka Modimo; ba lapileng ha se ke se ba fepa, ba nyorilweng se ba tima metsi.

⁷ Mekgwa ya senokwane e mebe, kamehla se rera merero e kgopo, ho timetsa mafutsana ka polelo tsa mashano, leha thapedi ya bahloki e nepahetse.

⁸ Empa ya kgabane o rera merero e kgabane, bokgabeneng ba hae a ke ke a sisinngwa.

Kahlolo le ntjhafatso

⁹ Lona basadi ba iketlileng, tsohang le mamele lentswe la ka! Lona barwetsana ba itshepileng, mamelang seo ke se bolelang!

¹⁰ Etlare hoba selemo se fetafete, lona basadi ba iketlileng le tla thothomela; morara o kotulwang o tla ba siyo, le ditholwana di ke ke tsa eba teng.

¹¹ Thothomelang, lona basadi ba iketlileng! Tlakaselang, lona barwetsana ba itshepileng! Hlobolang aparo tsa lona, itlameng matheka ka tse mahwashe!

¹² Llelang masimo a lona a matlematle, le llele morara o atlehileng;

¹³ le llele le naha ya tjhaba sa ka, naha e metseng meutlwa le hlabahlabane; llelang matlo wohle a boithabiso, le llele motse ona wa menyanyako.

¹⁴ Ntlo ya kgosi e tla sala e le feela, mmidimidi o hara motse o fele; qhobosheane le tora e tla ba dithako kamehla, tonki di thalle teng, le mehlape e fule teng,

¹⁵ ho fihlela Moya o tswang hodimo o theolelwa hodima rona, lehwatata le fetoha kgwiti ya masimo, kgwiti eo e tshwana le moru o teteaneng.

¹⁶ Toka e tla ba teng lehwatateng, ho loka ho be teng hara kgwiti ya masimo.

¹⁷ Ho loka ho tla beha tholwana ya kgotso, ho loka ho tswale kgutso le letshepa kamehla.

¹⁸ Tjhaba sa ka se tla phela naheng e nang le kgotso, se dule malapeng a sireletsehileng, bakeng tsa phomolo tse hlokang matshwenyeho.

¹⁹ Leha fako se ka ruthutha moru wa healla, motse wa heletswa kahohle, wa batalla,

²⁰ lona le tla ba lehlohonolo haholo, le jale peo ya lona mabopong a dinokana tsohle, pholo le tonki tsa lona di kgaphelwe sekwai.