Isaia 3 - BIBELE

Jerusalema le Juda di a ahlolwa

¹ Bonang Morena, Morena mabotho, o kgatheng la ho amoha Jerusalema le Juda, tsohle tseo di iphedisang ka tsona, a di amohe dijo tsohle le metsi wohle.

² O tla di amoha mohale le mohlabani, moahlodi le moporofeta, senohe le moholo wa setjhaba;

³ le molaodi wa bahlabani le lehosana, moeletsi le setsebi sa mesebetsi, le ya hlalefetseng ho upella.

⁴ Baokamedi ba bona e tla ba bashanyana, tlokotsebe tsa bana e be babusi ba bona.

⁵ Batho bohle ba tla hatellana, motho ka mong a hatelle e mong, ba ahisaneng le bona ba hatellane. Batjha ba tla tsohela baholo ba bona matla, ba eisehang ba tsohele batlotlehi matla.

⁶ Motho o tla tshwara e mong wa bana babo, a mo tshware a le lapeng labo, a re: “O na le seaparo, eba mmusi wa rona, masupi ana a ke a buswe ke wena!”

⁷ Mohlang oo eo o tla meketsa, a re: “Ha nka ke ka ba pheko ya lona, lapeng ha ka ha ke na dijo le seaparo, o ke ke wa nketsa mmusi, mmusi wa tjhaba sena!”

⁸ Jerusalema e kgothometsehile, Juda yona e se e putlame fatshe; Polelo le ketso tsa tsona di fetohetse Morena, di kgopisa mahlo a tlotlehang a hae.

⁹ Fahleho tsa tsona di a di qosa, di ipoletse sebe sa tsona jwaloka Sodoma, le ho se pata di sitwa ho se pata. Di madimabe hakaakang! Koduwa ena di imemetse yona!

¹⁰ Tsebisa ba lokileng hore tsohle di tla loka, ba tla ja ditholwana tsa mesebetsi ya bona.

¹¹ Ho madimabe ba kgopo, hobane koduwa e tla ba wela hodimo, ba putswe ho ya ka mesebetsi ya bona.

¹² Batjha ba hatella tjhaba sa ka, basadi ke bona babusi ba sona; tjhaba sa ka, badisa ba lona ba a le kgelosa, ba le faposa tseleng ya lona.

Morena o ahlola setjhaba sa hae

¹³ Morena o a ema, o bolela qoso ya hae, o a ema, o ahlola ditjhaba.

¹⁴ Morena o qosa baholo ba tjhaba sa hae, o qosa le babusi ba sona, o re: “Tshimo ya ka ya morara e lobetswe ke lona, matlo a lona a tletse tse amohilweng mafutsana.

¹⁵ Ke ka baka lang ha le hatakela setjhaba sa ka, mafutsana le wona le a tlatlapa?” ho rialo Morena, Morena mabotho.

Kgalemo ho basadi ba Jerusalema

¹⁶ Morena o re: “Basadi ba Sione ba a ikgohomosa, ba tsamaya melala ba e thamotse, ka mahlo a bona ba ntse ba bonya, ba rwanyaketsa, ba hatela haufi, maqaqailana a bona a lla masekana.

¹⁷ Kahoo Morena o tla kgophosa hlooho tsa bona, hlooho tsa bona a di phumole mafatla.”

¹⁸ Mohla tsatsi leo, Morena o tla ba amoha mekgabiso: mefitshane le meqhaka le difaha tsa molala;

¹⁹ masale, dipetja le wona masira;

²⁰ le dikola, le dithoto, le dinyepa, le dibotlolo tsa ditlolo, le dithatho;

²¹ le masale a monwana le masale a dinkong,

²² le diaparo tse majabajaba, le ditipe, le mekotlana;

²³ le diipone, le diaparo tsa lene, le dituku, le ditjale.

²⁴ Bakeng sa monko o monate ho tla nkga phu! Bakeng sa senyepa e be lerapo, bakeng sa moriri o lohilweng ba phumohe mafatla, bakeng sa aparo tse ntle e be tse mahwashe, bakeng sa fahleho tse borethe e be tse mabadi.

²⁵ Bana ba lona ba tla bolawa ka sabole, e leng bona bahale ba lona ntweng.

²⁶ Menyako ya Sione e tla lla, e bokolle, Sione e rapalle fatshe, e fetohe lesupi.