Isaia 29 - BIBELE

Motse wa Davida o madimabe

¹ Ariele! Ariele! O madimabe hakaakang! Wena motse oo Davida a kila emisa ho wona! A dilemo di fete ka ho latelana, le mekete ya hao e nne e hlahlamane.

² Ke tla o dihela koduwa hodimo, o be bofifing, o lle sa mmokotsane, o ke aletare e tukang mollo.

³ Ka mabotho ke tla o etsetsa sakana-la-nkope, ka ditora ke o etsetse thibella, ke hlome metero ho o potapota.

⁴ O tla bua o rapaletse fatshe, o bue o le leroleng la lefatshe; ntswe la hao e tla ka la sethotsela, polelo tsa hao di hweshetswe di etswa leroleng.

⁵ Matshwele a dira tsa hao a tla fetoha lerole, mphi tse sehloho di fefolwe sa mmoko, hanghang hona ho tla etsahala ka ho panya ha ntshi!

⁶ Morena wa mabotho o tla o pholosa, a o pholose ka diaduma le ka tshisinyeho ya lefatshe, a o pholose ka rata le leholo, ka sefefo le setsokotsane le malakabe a timetsang.

⁷ Matshwele a tjhaba tsohle tse lwantshang Ariele, a e futuhelang le qhobosheane ya yona, a e futuhele a be a e thibelle, a tla feta sa toro le pono ya bosiu.

⁸ Jwalokaha ya lapileng a ye a lore a eja, ere ha a tsoha a iphumane a ntsa lapile; jwalokaha ya nyorilweng a ye a lore a enwa metsi, ere ha a tsoha a iphumane a kgathetse, a nyorilwe; ho tla ba jwalo le ho matshwele a tjhaba tsohle, ho matshwele a lwantshang Thaba ya Sione.

Ha ba a natsa dikeletso

⁹ Tsherehanang le thotofale! Iphoufatseng le sitwe ho bona! Tahwang empa le sa nwa veine! Ratseelang empa le sa nwa jwala!

¹⁰ Morena o le tliseditse sephume sa boroko, o le tutubaditse, lona baporofeta, o le kgurumeditse dihlooho, lona dinohe.

¹¹ Ho wena pono ena e tshwana le buka e kwetsweng, ya bitielwa. Ha o ka e nea motho ya tsebang ho bala, wa re ho yena: “E bale!” eo o tla araba, a re: “Ke sitwa ho e bala, hobane e kwetswe, e bitietswe.”

¹² Leha o ka e nea motho ya sa tsebeng ho bala, wa re ho yena: “E bale!” eo o tla re: “Ha ke tsebe ho bala!”

¹³ Yaba Morena o a bua, o re: “Tjhaba sena se bua le nna ka melomo feela, se ntlhompha ka melomo ya sona feela, empa pelo tsa sona tsona di hole le nna; se ntshaba ho ya ka ditaelo tsa batho, ditaelo tseo se di rutilweng ke batho.

¹⁴ Kahoo tjhaba sena ke tla boela ke se makatsa, ke se etsetsa dimakatso tse ngata. Bohlale ba bahlalefi ba sona bo tla fela, kelello ya ba nang le kelello e nyamele.”

Tshepo ya kamoso

¹⁵ Ho madimabe ba patelang Morena merero ya bona, ba e etsetsang lefifing, ba re: “Ke mang ya re bonang? Ke mang ya re tsebang?”

¹⁶ Ntho le di hlabisa hlohlodingwane, jwalokaha eka sebopi sa tsona ke letsopa. Na se bopilweng se ka bua ka mmopi wa sona, sa re: “Hase yena ya mpopileng”? Na pitsa e ka bua ka sebopi sa yona, ya re: “Ha se tsebe letho”?

¹⁷ Haufinyane, Lebanone e tla fetoha masimo a kgwiti, kgwiti eo e fetohe moru o teteaneng.

¹⁸ Ka tsatsi leo, bo-tutu ba tla utlwa polelo tsa buka, leha difofu di le lefifing, di le botshong, mahlo a tsona a tla bona.

¹⁹ Baikokobetsi ba tla boela ba thabela Morena, mafutsana a thabele Ya Halalelang wa Iseraele.

²⁰ Ba sehloho ba tla timela, le basomi ba fele, ba tjhatjhehelang bobe le bona ba timetswe:

²¹ Ba beang motho molato ka polelo tsa bona, ba tswakeletsang ya emelang toka ka lekgotleng, ka paki ya bohata ba sitise ya lokileng, ba mo sitise ho ahlolwa ka toka.

²² Ka baka leo, Morena ya lopolotseng Aborahama o bua tjena ho ba lelapa la Jakobo: “Jakobo ha a sa tla hlola a hlajwa ke dihlong, fahleho sa hae ha se ka ke sa hlola se pudufala.

²³ Bana ba hae ba tla halaletsa lebitso la ka, ha ba bona mosebetsi wa matsoho a ka, ba halaletse lebitso la ka, ba halaletse Ya Halalelang wa Jakobo, ba tshabe Modimo wa Iseraele.

²⁴ Bao meya ya bona e lahlehileng ba tla ba le kutlwisiso, ba neng ba belaela ba thabele ho fumana thuto.”