Isaia 28 - BIBELE

Ho madimabe Efraime

¹ Ho madimabe mofaphlooho wa botlotlehi, oo matahwa a Efraime a kgabang ka wona! Ho madimabe thunthung e ponang, eo e leng tlotla ya botle ba hae, e metseng qetheng ya kgohlo e manoni, eo matahwa a ikgantshang ka yona!

² Bonang, Morena o na le ya matla, ya sefutho, ya kang fefo sa lehodiotswana se senyang, ya kang pula ya ditlwebelele ya morallo: Ke yena ya tla o akgela fatshe ka sefutho.

³ Mofapahlooho wa botlotlehi wa matahwa a Efraime, o tla hatakelwa ka maoto.

⁴ Thunthung e ponang, e leng tlotla ya botle ba hae, e metseng qetheng ya kgohlo e manoni, e tla ka feiye e butswang pele ho lehlabula, e kgolwang ke ya e bonang, ebe o a e ja.

⁵ Ka tsatsi leo, Morena wa mabotho e tla ba mofapahlooho wa tlotla, e be moqhaka o kgabane ho masalla a tjhaba sa hae.

⁶ E tla ba moya wa toka ho ba okametseng kahlolo, le wa bonatla ho ba phumelang sera kgorong ya motse.

Esaya le baporofeta ba matahwa ba Juda

⁷ Batho bana le bona ba thekesediswa ke veine, jwala bo bohale bo etsa hore ba kgothometsehe; baprista le baporofeta ba thekesediswa ke jwala, kelello di tsherehantswe ke ho itlopa veine, jwala bo bohale bo etsa hore ba kgothometsehe; ba bona dipono ba ntse ba thekesela, dinyewe ba di ahlola ba ntse ba ratseela ke jwala.

⁸ Tafole tsohle di tletse mahlatsa le ditshila, ha ho na sebaka le se seng se hlwekileng.

⁹ “Ke bo-mang bao moporofeta a tla ba ruta? Molaetsa wa hae o tla o hlalosetsa bo-mang? O loketse masea a sa tswa kgweswa, bana ba sa tswa tloswa letsweleng!

¹⁰ Thuto ya hae ke: Molao hodima molao, molao hodima molao, taelo hodima taelo, taelo hodima taelo; hanyenyane mona, hanyenyane mane.”

¹¹ Kahoo Morena o tla bua le tjhaba sa hae, a bue le sona ka maleme a batho basele, a bue le sona ka maleme a baditjhaba.

¹² O kile a bua le sona, a re: “Ke tla le fa phomolo ya sebele, ba kgathetseng ba tlo phomola; ke tla fela ke le kgatholle.” Leha ho le jwalo, ha ba a ka ba mamela.

¹³ Ka baka leo ntswe la Morena e tla ba lena ho bona: Molao hodima molao, molao hodima molao, taelo hodima taelo, taelo hodima taelo; hanyenyane mona, hanyenyane mane, etlere ha ba tsamaya ba we ka sanketse, ba robehe, ba tshwaswe, ba thopuwe.

Lejwe la motheo la Sione

¹⁴ Mamelang lona basomi ba busang tjhaba se Jerusalema, lentswe la Morena ke lena:

¹⁵ Lona le itse: “Re entse selekane le lefu, ra etsa tumellano le Nqalo ya Bafu. Ha koduwa e tshabehang e wela lefatshe, rona e tla re feta mohwalotso, hoba leshano ke tshabelo sa rona, bohata ke bona tshireletso ya rona.”

¹⁶ Kahoo Morena o bua tjena: “Ke bea lejwe la motheo Sione, lejwe le lekilweng, la bohlokwa, la mantlha; ke lejwe la nnete, la motheo: ‘Ya dumelang hona o tla ba le mamello.’

¹⁷ Toka e tla ba kgwele e lekanyang, ho loka e be kgwele e otlollang; sefako se tla hohola tshabelo sa mashano, metsi a kwahele baka tsa ho ipata.”

¹⁸ Selekane sa lona le lefu se tla fediswa, tumellano ya lona le Nqalo ya Bafu e fediswe. Mohla koduwa e tshabehang e welang lefatshe, e tla le wela hodimo, e le hatakele.

¹⁹ Kamehla ha e feta e tla le hohola, e le hohole hoseng, motsheare le bosiu; ha le utlwisisa molaetsa ebe le a tshoha.

²⁰ Moalo o mokgutshwanyane hoo o ke keng wa nama, kobo e nyenyane hoo o ke keng wa ikatela.

²¹ Morena o tla hlaha sa mohla thabeng ya Perasime, kgalefo ya hae e tlokome, sa mohla Kgohlong ya Gibeone, a phethe mosebetsi wa hae o hlollang haholo, a phethe ketso tsa hae tse tsotehang haholo.

²² Ka baka leo, se iketseng basomi, esere mahlaahlela a imela matsoho a lona, hobane ke utlwile ha ho phatlalatswa timetso, e phatlalatswa ke Morena, Modimo wa mabotho, a re lefatshe lohle le tla timetswa.

Bohlale ba Modimo

²³ Theang tsebe le utlwe lentswe la ka, mamelang le utlwe polelo tsa ka.

²⁴ Na ya lemelang ho jala a ka lema motjha-o-tjhele? A dulela ho lema le ho phophotha makwete?

²⁵ Ha a thuile makwete o jala kolojannere le sepaile, ebe koro yona o e jala ka mela, harese le mabele a di jale temeng ya tsona.

²⁶ Tsena o di rutilwe ke Modimo wa hae, a mo kwetlisetsa tsona hantle.

²⁷ Ha ho polwa kolojannere ha ho sebediswe selei, mabidi a kariki ha a pole sepaile; molamu o sebediswa ha ho polwa kolojannere, sepaile sona se polwe ka lere.

²⁸ Na koro e hailwa hore e thumisehe? Tjhe, ha e ke e hailwa kamehla; leha e hatiswa ka mabidi a kariki, dipere ha di ke be di e thumise.

²⁹ Tsena tsohle di tswa ho Morena wa mabotho, keletso tsa hae ke tse makatsang, bohlale ba hae ke bo tebileng.