Isaia 21 - BIBELE

Babilona e a ripitlwa

¹ Bona ke boporofeta malebana le lehwatata le pela Lewatle: Jwaloka ditsokotsane tse ferellang naheng ya Borwa, ya futuhang o tla hlaha a etswa lehwatateng, a hlahe a etswa naheng, naheng ya matshabeho.

² Ke bontshitswe pono e tshosang: Moeki o a eka, motimetsi o a timetsa. Futuha wena Elame! Thibella wena Media! Matshabeho wohle ke tla a fedisa!

³ Theka la ka le opa habohloko, ke tshwerwe ke mahlaba sa mosadi a kena tlung, ke kotlobane hoo ke sitwang ho utlwa, ke tshohile hoo ke sitwang ho bona.

⁴ Pelo ya ka e a uba, ke thothomela ke tshabo, shwalane eo ke e hlolohetsweng e nkenyeditse letswalo.

⁵ Dijo di se di lokile, meseme e se e adilwe, ho a jewa, ho bile ho a nowa. Emang lona mahosana, thebe tsa lona le di tlotse ka ole.

⁶ Morena o itse ho nna: “Tsamaya o yo bea sebohodi, se tle se behe seo se se bonang.

⁷ Ha se bona bapalami ba dipere ka bobedi, se bona bapalami ba ditonki le ba dikamele, se ke se be sedi, se be sedi haholo.”

⁸ Sebohodi sa hlaba mokgosi, sa re: “Monga ka, ke qeta letsatsi ke eme hodima tora, masiu a ntshella ke ntse ke lebetse.”

⁹ Bonang, ho tla bapalami ba dipere ka bobedi! Sebohodi sa boela sa bua, sa re: “Babilona e wele! Babilona e wele! Tshwantsho tsa medimo ya bohata, medimo e betlilweng, di bjaramane, di hasantswe fatshe!”

¹⁰ Oho, tjhaba sa ka se ripitlilweng seotlong, jwaloka koro, ke le bolella seo ke se utlwileng, ke se utlwa ho Morena wa mabotho, Modimo wa Iseraele.

Modimo o otla Duma

¹¹ Bona ke boporofeta malebana le Duma: Ke howeletswa ke motho a le Seire, o re: “Sebohodi, ekaba bosiu bo tla sa neng? Sebohodi, ekaba bosiu bo tla sa neng?”

¹² Sebohodi sa araba, sa re: “Tsatsi le tla tjhaba, ho boele ho phirime. Ha le rata ho botsa, botsang! Le boele le kgutle le tlo botsa hape!”

Modimo o tla otla Arabia

¹³ Bona ke boporofeta malebana le Arabia: Lona mekoloko ya batsamai, batsamai ba Badedane, robaletsang matswatlareng a Arabia.

¹⁴ Lona baahi ba naha ya Tema, tlisang metsi ho ba nyorilweng; tlisang dijo ho baphaphathehi.

¹⁵ Ba balehile sabole e ntshitswe selateng, ba baleha diqha le malakabe a ntwa.

¹⁶ Morena o buile tjena ho nna: “Etlare ho eso fete selemo, ho ya kamoo mohlanka a balang dilemo kateng, botlotlehi ba Kedare bo be bo fedile.

¹⁷ Masalla a bo-rametsu, e leng bahale ba Kedare, a tla ba mmalwana.” Morena Modimo wa Iseraele, o boletse jwalo.