Hosea 6 - BIBELE

Setjhaba se hana ho baka

¹ “Tloong, re kgutleleng ho Morena: Ke yena ya re hlenhlantseng dinama, empa ke yena ya tla re fodisa; ke yena ya re ntshitseng maqeba, empa ke yena ya tla a tlama.

² Kamora matsatsi a mabedi o tla re phedisa, ka tsatsi la boraro ebe o a re emisa, re tle re phele mmoho le yena.

³ A re lekeng ho tseba Morena, re ikitlaeletseng ho mo tseba. Ho tla ha hae ke ha nnete, ha nnete ya ho tla ha mafube; o tla tla ho rona sa medupe ya pula, sa pula tse kolobisang, tse kolobisang mobu selemo.”

⁴ Empa Morena o re: “Wena Efraime, ke etse jwang ka wena? Wena Juda, ke etse jwang ka wena? Rato la lona le ka mohodi o thibang hoseng, le ka phoka ya meso e nyamelang kapele.

⁵ Kahoo ke le kgalemetse ka baporofeta ba ka, ka dipolelo tsa ka ka le timetsa, kahlolo tsa ka tsa le wela sa lehadima.

⁶ Ke thabela mohau e seng mahlabelo, ho tseba Modimo, e seng nyehelo tsa setjheso.

⁷ Ba sentse selekane sa ka jwaloka motse wa Adamo, kahoo ba ntlhokela botshepehi.

⁸ Gileade ke motse wa ba etsang bokgopo, Gileade ke motse o kganathetseng madi a batho.

⁹ Jwalokaha dinokwane di ye di lalle motho, hlopha sa baprista le sona se a lalla, se bolaele batho tseleng e yang Shekeme, mahlabisadihlong ana se a etse ka morero.

¹⁰ Ke bone manyala ka tlung ya Iseraele, Efraime o etsa bootswa, o bo etsetsa hona kateng, mme Iseraele o itshilafaditse.

¹¹ Le wena Juda, kahlolo e o emetse, mohla ke kgutlisang setjhaba sa ka.”