Diproverbia 9 - BIBELE

Bohlale le bothoto

¹ Bohlale bo hahile ntlo ya bona, ba hloma ditshiya tsa yona, ba di hloma di supile;

² ba hlaba dikgomo, ba ritela veine, tafoleng ya bona ba bea mapetle.

³ Bo romme makgabunyane a bona ho ya howa a le qhoweng ya motse:

⁴ “Bohle ba se nang tsebo ba ke ba tle kwano!” Le ho ba hlokang kelello bo re:

⁵ “Tloong le tlo ja, le itjelle dijo tsa ka, le inwelle veine eo ke e ritetseng.

⁶ Furallang ba se nang tsebo le tle le phele, le tsamaye tseleng ya kutlwisiso.

⁷ “Ya layang mosomi o ipiletsa mahlapa, ya kgalemang ya kgopo o ipiletsa ho tlontloloha.

⁸ Se kgaleme mosomi, esere a o hloya, kgalema ya bohlale, yena o tla o rata.

⁹ Rupela mohlalefi a tla hlalefe haholo, o rute ya lokileng a eketse thuto ya hae.

¹⁰ “Ho tshaba Morena ke qaleho ya bohlale, ho tseba Ya Halalelang ke yona kutlwisiso.

¹¹ Ke ka nna bohlale tshiu tsa hao di tla anafala, lemo tsa bophelo ba hao di lelefatswe.

¹² Haeba o le bohlale, bohlale ba hao bo tla o putsa, haeba o le mosomi, molato e tla ba wa hao.”

¹³ Bothoto bo ka mosadi, mosadi ya lerata haholo: Ha a tsebe letho, ke tseketseke.

¹⁴ O kokomala monyako wa ntlo ya hae, tulong se beilweng qhoweng, sa bewa qhoweng ya motse.

¹⁵ O emeletse ho bitsa, ho bitsa bo-mofeta-ka-tsela, ba ikelang ka tsela tsa bona.

¹⁶ O re: “Kenang le mona lona ba se nang tsebo!” O rialo ho ba hlokang kelello.

¹⁷ “Metsi a utsuwang a monate haholo, qhoqha e jelwang sephiring e a hlabosa!”

¹⁸ Ya se nang tsebo ha a tsebe hore lefu le laletse moo, baeti ba mosadi eo ba feletse lebitleng.