Diproverbia 8 - BIBELE

Bohlale bo a roriswa

¹ Na ebe bohlale ha bo howe? Kutlwisiso yona ha e phahamise ntswe la yona?

² Bo eme tseleng tse phahameng, bo eme mateanong a ditsela.

³ Bo howeletsa bo le kgorong tsa motse, bo howeletsa bo le monyako wa motse:

⁴ “Banna, mamelang, ke bitsa lona, ke ipiletsa ho batho bohle.

⁵ Lona ba se nang tsebo ithuteng bohlale! Lona dithoto batlang kutlwisiso!

⁶ Theang tsebe ke le bolelle tsa bohlokwa, ke le phatlalletse tse lokileng.

⁷ Ke tla bua nnete feela, hobane bokgopo ke bo hloile.

⁸ Polelo tsohle tsa ka ke tsa nnete, thetso le bomenemene ha di yo ho tsona,

⁹ di utlwahala tsohle ho ya nang le kelello, di nepahetse tsohle ho ba nang le tsebo.

¹⁰ Inkeleng thuto ya ka ho ena le silefera, ikgetheleng tsebo ho ena le kgauta.

¹¹ “Bohlale bo molemo ho feta mabenyane a bohlokwa, ha ho letho le ka bapiswang le bona.

¹² Nna, Bohlale, ke fana le ka masene, tsebo le tlhalohanyo le tsona ke di ruile.

¹³ Ho tshaba Morena ke ho hloya bobe, ke hloile boikgohomoso, ke hloile le boikakaso, boitshwaro bo bobe le leshano le tsona ke di hloile.

¹⁴ Boeletsi le ho ba sedi le tsona ke tsa ka, kutlwisiso le matla le tsona ke tsa ka.

¹⁵ Ke ka nna kgosi di tsebang ho rena, le babusi ba etsang melao e lokileng.

¹⁶ Ke ka nna mahosi le mahosana a tsebang ho busa, le baahlodi bohle ba tsebang ho ahlola.

¹⁷ Ba nthatang le nna ke a ba rata, ba mpatlang bona ba tla mphumana.

¹⁸ Ho nna maruo le tlotla di teng, maruo a sa feleng le hona ho loka.

¹⁹ Tholwana ya ka e kgahleha ho feta kgauta, e feta kgauta e hlwekisitsweng, tse fumanwang ho nna di feta silefera e hlwekisitsweng.

²⁰ Ke tsamaya tseleng ya toka, tsela ya ka ke tsela ya molao.

²¹ Ba nthatang ke ba abela lefa, matlole a bona ke a tlatse, a be mohlohlo.

²² “Morena o mpopile qalehong ya mesebetsi ya hae, pele ho mesebetsi ya hae, mesebetsi ya kgalekgale;

²³ ke hlodilwe kgale, pele ho mehla yohle, ke hlodilwe tshimolohong, fatshe le eso be teng.

²⁴ Ka tswalwa pele mawatle a eba teng, didiba tse kollang di eso ka di runya;

²⁵ ka tswalwa thaba di eso ka di thewa, ka tswalwa le maralla a eso be teng,

²⁶ pele fatshe le eba teng le masimo a lona, pele role la lefatshe le lona le eba teng.

²⁷ Ke ne ke le teng ha a bea mahodimo bakeng sa wona, a seha moedi wa loapi, a o seha hodima mawatle;

²⁸ ha a etsa lenamola la maru, a le etsa sepakapakeng, a phunya mehlodi ya madiba a e tsitsisa;

²⁹ ha a sehela lewatle moedi wa lona, metsi a se ke a tlola taelo ya hae; le ha a rala metheo ya lefatshe.

³⁰ Ke ne ke le tsoho la hae le letona, ka matsatsi wohle ke mo thabisa, ke nyakaletse ke le kapele ho yena;

³¹ ke thabetse lefatshe e le la hae, ke thabetse le batho a ba bopile.

³² “Jwale, bana ba ka, mmameleng! Ho lehlohonolo ba tsamayang tseleng tsa ka.

³³ Mamelang thuto ya ka le tle le hlalefe, le se ke la hana ho e mamela.

³⁴ Ho lehlohonolo motho ya mmamelang, ya lebelang kamehla menyakong ya ka, ya kokomalang thuleng la ntlo ya ka.

³⁵ Ya mphumanang o fumana bophelo, Morena o tla mo rekolohela.

³⁶ Ya sa mphumaneng o ipea kotsing, bohle ba ntlhoileng bona ba rata lefu.”