Diproverbia 7 - BIBELE

¹ Mora wa ka, boloka polelo tsa ka, o boloke taelo tsa ka, di boloke ka pelong ya hao.

² Boloka taelo tsa ka o tle o phele, thuro tsa ka le tsona di hlokomele; di hlokomele seka thaka ya ihlo la hao.

³ Di tlamelle menwaneng ya hao, o di ngole tlapeng la pelo ya hao.

⁴ Ere ho bohlale: “Wena kgaitsedi,” kutlwisiso yona e bitse motswalle wa hao.

⁵ Di tla o phemisa mosadi, mosadi wa sehlola, mosadi ya ekang ka dipolelo.

Mosadi wa sehlola

⁶ Fesetereng ya ntlo ya ka ka tadima ka mamatjana a yona.

⁷ Ka tadima hara ba se nang tsebo, ka bona mohlankana ya hlokang kutlwisiso,

⁸ a feta pela huku ya seterata, a tsamaya ka tsela e yang ha sehlola;

⁹ e le ka shwalane, tsatsi le se le diketse, fifi la bosiu le qala ho aparela.

¹⁰ Mosadi a betseha ho mo kgahlanyetsa, a apere jwaloka seotswa, ka maqheka a sona.

¹¹ O manganga, ke mmadiberwane, ke pheka-ke-leoto, ha a dule hae;

¹² ere a le seterateng, a be a se a le mabaleng, a qatjhama jwalo hukung tsa diterata.

¹³ A mamarela mohlankana enwa, a mo aka, ka fahleho se hlokang tlhong a re ho yena:

¹⁴ “Kajeno ke entse nyehelo ya ka, kano tsa ka kajeno ke di phethile, ke na le dijo tsa nyehelo eo, ke na le tsona ha ka;

¹⁵ ke tlile tjena ho o kgahlanyetsa, kgale ke o batla, jwale ke o fumane!

¹⁶ Hodima moalo wa ka ke adile masela a lene, lene e mebalabala e tswang Egepeta.

¹⁷ Ke nonoditse moalo wa ka ka mmira, ka o nonotsa ka lekgala le sinamone.

¹⁸ Tloo, re kgotsofatse rato la rona ho fihlela bo esa, re ithabise ka ho mamarelana.

¹⁹ Hae mona monna wa ka ha a yo, o nkile leeto, o ile hole.

²⁰ O nkile mokotlana o tletse tjhelete, o tla kgutlela hae kgwedi e tolokile.”

²¹ Ka puo tsa lehelehele lena mohlankana a ineela, ka molomo wa lona o ekang, mohlankana a hapeha.

²² Ka ho panya ha ntshi mohlankana a le sala morao, a le latela sa pholo e iswa tlhabong, sa kgama e tlolela ka lemeneng;

²³ sa nonyana e tshwaswa ke raba le tjhehilwe, e sa tsebe hore jwale e ya lefung, ho fihlela ha motsu o e phunya sebete.

²⁴ Jwale bana ba ka mmameleng, sekehelang polelo tsa ka tsebe.

²⁵ Pelo tsa lona di se latele mekgwa ya seotswa, le se tsamaye mehlaleng ya sona.

²⁶ Mahlatsipa a mangata se a entse mofela, tshwele la ba bolailweng ke sona ha le na palo.

²⁷ Ntlo ya sona ke tsela e isang lebitleng, ke mmila o isang Nqalong ya Bafu.