Diproverbia 6 - BIBELE

Dikeletso mabapa le bothoto

¹ Mora wa ka, ha o itlamme ho lefa molato wa wa heno, wa hlapanyetsa e mong ho mo lefella,

² polelo tsa hao di tla o tshwasa, mantswe a hao a o etsetse leraba.

³ Ha o rata ho itokolla, mora ka, kahobane o tla be o le matsohong, matsohong a mohaeno, etsa tjena: Eya, o ikokobetse ho yena, o mo rapele ho fihlela a o mamela.

⁴ O se ke wa robala, leha e le hona ho otsela.

⁵ Ipholose sa tshepe matsohong a setsomi, ipholose sa nonyana rabeng la motshwasi wa yona.

⁶ Hela! wena sekgoba, tsamaya o ye ho bohlwa! Hlahloba mekgwa ya bona, o tlo hlalefe!

⁷ Leha bo se na motsamaisi, bo se na mmusi le mohlahlobi,

⁸ hlabula bo ipatlela dijo tsa bona, bo ipokellele tsona ha ho kotulwa.

⁹ Wena sekgoba, o tla robala ho fihlela neng? O tla tsoha neng borokong ba hao?

¹⁰ O re: “A nke ke re shwa! ke boele ke re shwa! ke phuthaphuthe matsoho, ke iphomolele.”

¹¹ Fuma ba hao bo tla o nanarela, bo o nanarele jwaloka senokwane, tlala e o wele hodimo sa motho a nkile dihlomo.

¹² Motho e mobe, ya kgopo, o tsamaya a fefetha leshano;

¹³ o roba leihlo la hae, a ngolangole fatshe ka leoto, a qhwayaqhwaye ka monwana;

¹⁴ o rera thetso ka pelong ya hae, kamehla o jala moferefere.

¹⁵ Koduwa e tla mo wela hodimo, e mo wele hodimo ka tsometso, a timetswe hanghang ho se na pheko.

¹⁶ Ntho di tsheletse, tseo Morena a di hloileng, e, di supile tseo e leng manyala ho yena:

¹⁷ Ke mahlo a ikgohomosang, leleme le tletseng thetso, matsoho a tshollang madi, madi a se nang molato;

¹⁸ pelo e rerang bokgopo, maoto a potlakelang bobeng;

¹⁹ paki ya bohata, e bolelang leshano, le ya jalang diqabang hara bana ba motho.

Keletso mabapa le bohlola

²⁰ Mora wa ka, boloka taelo tsa ntatao, o se furalle thuto ya mmao;

²¹ di boloke ka pelong ya hao, di rwale molaleng wa hao.

²² Ha o tsamaya di tla o etella pele, ha o robala ebe di a o lebela, ha o tsoha ebe di bua le wena.

²³ Taelo ke lona lebone, thuto ke lona lesedi, kgalemo ke bona bophelo,

²⁴ ho o phemisa mosadi wa sehlola, le molomomonate wa seraburabu.

²⁵ Pelo ya hao e se lakatse botle ba sona, mahlo a sona a se ka o hohela,

²⁶ hoba seotswa, le ka sengwatho o ka se reka, athe sehlola sona se tsoma bophelo ba hao.

²⁷ Na motho a ka okga mollo, a o okgela fubeng sa hae, ebe aparo tsa hae tsona ha di tuke malakabe?

²⁸ Na motho a ka tsamaya hodima mashala, ebe maoto a hae wona ha a tjhe?

²⁹ O jwalo ya kenang kobong tsa mosadi wa motho, ya amang mosadi, eo a ke ke a phema kahlolo!

³⁰ Shodu ha le utswa hoba le lapile, batho ha ba ke ba le nyedisa.

³¹ Ha le ka tshwarwa le tla lefa hasupa, le lefe ka tsohle tsa lapa la lona.

³² Motho ya febang o hloka kelello, ya etsang jwalo o timetsa bophelo ba hae;

³³ o tla batwa leoma a tlontlolohe, dihlong tsa hae di se ke tsa hlola di fela.

³⁴ Poulelo e halefisa monga mosadi, ha a iphetetsa ha a qenehele letho;

³⁵ a ke ke a amohela tefo ya mofuta ofe le ofe, a ke ke a kgotsofatswa ke dimpho, leha mpho tseo di ka ba ngata.