Diproverbia 4 - BIBELE

Melemo ya bohlale

¹ Bana, mamelang thuto, thuto ya ntata lona, le e ele hloko, e tle le ruise kutlwisiso.

² Ke le nea thuto ya sebele, se e furalleng ke hona.

³ Ha ke ne ke le ngwana ya ratwang ke ntatae, ngwana ya mong feela, sebokotswa-ke-mmae,

⁴ ntate a na nthuta, a re: “Polelo tsa ka di se tlohe pelong ya hao, boloka taelo tsa ka o tle o phele.

⁵ Iphumanele bohlale, iphumanele kutlwisiso, se lebale polelo tsa ka, o se di kgelohe;

⁶ se furalle bohlale, bo tla o sireletsa; bo rate, bo tle bo o lebele.

⁷ Bo kahodimo ho tsohle, iphumanele bona, ka tsohle tseo o nang le tsona, o bo reke, o iphumanele kutlwisiso.

⁸ Bo thoholetse, bo tla o phahamisa; ha o bo kgomarela bo tla o tlotla.

⁹ Bo tla kgabisa hlooho ya hao, bo e kgabise ka moqhaka o bohehang, bo o rwese mofapahlooho wa tlotla.”

¹⁰ Mora wa ka, mamela, o amohele polelo tsa ka, lemo tsa bophelo ba hao di tle di ate.

¹¹ Ke o rutile tsela tsa bohlale, ka o tsamaisa tseleng tse otlolohileng.

¹² Ha o tsamaya o ke ke wa sitiswa ke letho, ha o matha o ke ke wa kgoptjwa.

¹³ Tshwara thuto ena, o e mamarele, o e dise ka thata, ke yona bophelo ba hao.

¹⁴ Se tsamaye tseleng tsa ba kgopo, se tsamaye tseleng ya baetsadibe.

¹⁵ E kgese, o be o e kwekwetle; e kgelohe, o ikele ka tsela ya hao.

¹⁶ Ha ba sa etse bokgopo ha ba robale, ba fadimehiswa ke takatso ya ho bolaya.

¹⁷ Ba ja bohobe ba bokgopo, ba nwe veine ya meferefere.

¹⁸ Tsela ya ba lokileng e ka mafube a meso, kganya ya yona e eketseha, ho fihlela hara mpa motsheare.

¹⁹ Tsela ya ba kgopo e ka fifi le letsho, ha ba tsebe se ba kgothometsang.

²⁰ Mora wa ka, mamela mantswe ana a ka, o sekehele polelo tsa ka tsebe.

²¹ Polelo tsa ka o se di lebale, o di boloke ka pelong ya hao;

²² ke bophelo ho ba di amohelang, di phedisa mmele ya bona hamonate.

²³ Baballa pelo ya hao, e baballe ho feta tsohle, hobane ke yona diba sa bophelo.

²⁴ Se bue leshano ka molomo wa hao, puo tse thetsang di se tswe ka hanong la hao.

²⁵ Mahlo a hao a tadime kapele ho wena, dintshi tsa hao di se ke tsa panya.

²⁶ Qamaka ka hloko moo o hatang teng, tsela tsohle tsa hao di tle di tsitse.

²⁷ Se kgelohele ka ho le letona kapa ka ho le letshehadi, mehato ya hao e o phemise bokgopo.