Diproverbia 29 - BIBELE

¹ Motho ya nnileng a kgalengwa empa a satalatsa molala, hanghang o tla welwa ke kotsi, pheko e be siyo.

² Ha ba lokileng ba ngatafala, tjhaba se a nyakalla, empa ha ba kgopo ba busa tjhaba se a lla,

³ Ya ratang bohlale o thabisa ntatae, ya mathang le diotswa o hafaka leruo la hae.

⁴ Ha kgosi e thahasella toka, puso e a tsitsa, kgosi e kgethisang setjhaba haboima e futsanehisa naha.

⁵ Motho ya phoqang mohahabo o itjhehela leraba ka boyena.

⁶ Sebe sa ya kgopo ke lemena ho yena, empa ya lokileng o bina a nyakaletse.

⁷ Ya lokileng o hlokomela tokelo tsa bafumanehi, empa ya kgopo yena ha a di natse ka letho.

⁸ Basomi ba fehla moferefere, ba o fehla kahara motse, empa ba bohlale ba kokobetsa kgalefo.

⁹ Ha motho ya bohlale a qosana le ya sethoto, leha ya sethoto a ka halefa, kapa a tsheha, kgotso e ke ke ya eba teng.

¹⁰ Ba nyoretsweng madi ba hloile ba lokileng, empa ba lokileng ba boulela bophelo ba hae.

¹¹ Sethoto se hlatsa kgalefo ya sona, empa ya bohlale yena o a e bipa.

¹² Ha mmusi a mamela mashano, bahlanka ba hae bohle ba tla ba kgopo.

¹³ Mofumanehi le mohatelli ba tshwana ka sena: Morena o tutubolla mahlo, mahlo a bona bobedi.

¹⁴ Kgosi e ahlolelang bafumanehi, e ba ahlolelang ka toka, terone ya yona e tla tsitsa kamehla yohle.

¹⁵ Thupa le kgalemo di tlisa bohlale, empa ngwana ya tlohetsweng feela, o hlabisa mmae dihlong.

¹⁶ Ha ba kgopo ba anafala, bokgopo bo a eketseha; empa ba lokileng ba tla bona ha ba timela.

¹⁷ Kgalema mora wa hao, o tla fumana phomolo, le moya wa hao o nyakalle.

¹⁸ Tjhaba se sa senolelwang ditaba, se iketsetsa borata, empa ho lehlohonolo ya bolokang molao.

¹⁹ Lekgoba le ke ke la kgalengwa ka ho buiswa feela, le hoja le utlwisisa, le ke ke la phetha taelo.

²⁰ Motho eo ereng ha a bua a phasolohe, o ka tshepa sethoto ho ena le yena.

²¹ Ya bokotsang kgoba la hae ha a le hodisa, le tla qetella le mo hlokela teboho.

²² Motho ya bohale o baka diqabang, ya hlonameng yena o tletse bokgopo.

²³ Boikakaso ba motho bo a mo diha, empa boikokobetso bo mo tlisetsa hlompho.

²⁴ Motswalle wa leshodu o itlhoile, o utlwa thohako, empa ha a e natse,

²⁵ Ho tshaba batho ke ho itjhehela leraba, empa ya tshepang Morena o tla bolokeha.

²⁶ Ba bangata ba batla ho ratwa ke mmusi, empa motho o fumana toka ho Morena feela.

²⁷ Ba lokileng ba nyonya ba sa lokang, ba sa lokang ba nyonya ba lokileng.