Diproverbia 27 - BIBELE

¹ O se ke wa ithorisa ka la hosasane, hobane ha o tsebe hore le ka o tlela ka dife.

² Motho ha a ithorise o roriswa ke ba bang, a ka roriswa ke basele, e seng yena a ithorise.

³ Lejwe le boima, le lona lehlabathe, ho halefiswa ke sethoto ho boima ho di feta.

⁴ Kgalefo e sehloho, bohale bo a tlokoma, empa mona o ka engwa ke mang kapele?

⁵ Ho kgalema motho sefahlamahlo ho molemo ho feta rato la lekunutu.

⁶ Ho batwa ke motswalle ho na le molemo, empa ho akwa ke sera ke thetso.

⁷ Ya nyonyobetseng o hlaba kgora ka sefeamaeba, athe ho ya lapileng le ho babang ho a latsweha.

⁸ Monna ya furallang lapa la hae, o tshwana le nonyana e furallang sehlaha sa yona.

⁹ Ditlolo le menkwane di thabisa pelo ya motho, keletso e ntle ya motswalle le yona e thabisa jwalo.

¹⁰ Se furalle motswalle wa hao kapa wa ntatao, ha o le bothateng, se itlwaetse ho ya ha ngwaneno; motswalle ya haufi o na le thuso, ho feta ngwaneno ya hole.

¹¹ Mora ka, hlalefa, o thabise pelo ya ka, ke tle ke arabe motho ya nnyatsang.

¹² Ya sedi o elellwa kotsi, a batle setshabelo, empa ya se nang tsebo o tlatselaka feela, a wele kotsing.

¹³ Nka seaparo sa ya itlammeng ho lefa molato wa e mong; mo ntshise tebeletso bakeng sa mosadi wa sehlola.

¹⁴ Ya dumedisang mohahabo ka ho mo tlatsetsa lerata, a mo tlatsetsa lerata ka matjeke, tlhohonolofatso ya hae e tla fetoha thohako.

¹⁵ Metsi a rothang ho ya ho ile ha pula e ena, a tshwana hantle le mmadikomang.

¹⁶ Ho mo thodisa ho tshwana le ho thiba moya, kapa ho kgakeletsa ole ka seatla.

¹⁷ Tshepe e leotswa ka tshepe e nngwe, monna o tentshwa tshea ke banna ba bang.

¹⁸ Ya hlokomelang fate sa feiye, o tla ja tholwana tsa sona; ya baballang monga hae hantle, o tla tlotlwa ke yena.

¹⁹ Jwalokaha motho a ipona sefahleho ka metsing, pelo ya motho le yona ke seipone sa hae.

²⁰ Nqalo ya Bafu le mohohlo wa timelo ha di ke di tlala, le wona mahlo a motho ha a kgotsofale.

²¹ Silefera e hlwekiswa ka ho qhibidiswa pitseng, kgauta yona ka seboping sa yona, le motho o ahlolwa ka botumo ba hae.

²² Lehlanya o ka le tulella ka lefudung, wa le silella le mabele ka tshilo; empa bohlanya bo ke ke ba le tlohela.

²³ Eba mafolofolo ho lekola kgutshwane tsa hao, o hlahlobe mehlape ya hao hantle;

²⁴ hobane leruo ha le hlole kamehla yohle, le mofapahlooho wa kgosi ha o fetele melokong yohle.

²⁵ Ha jwang ba thoko bo fedile, jwang bo botjha bo se bo hlahile, mme jwang bo matswapong bo bokeletswe,

²⁶ o tla apara tsa boya ba dikonyana, ka dipotsanyane o reke masimo.

²⁷ Bese la dipodi le tla o lekana, e be dijo tsa hao le tsa lapa la hao, o fepe le makgabunyane a hao.