Diproverbia 26 - BIBELE

¹ Jwaloka lehlwa le kgethehang hlabula, kapa pula e nang ka nako ya ha ho kotulwa, hlompho le yona ha e tshwanele sethoto.

² Jwaloka serobele se phuphuselang, kapa lefokotsane le okaokelang, motho ha a silafatswe ke thohako ya lefeela.

³ Phafa e shapa pere, tonki e hulwa ka tomo, thoto sona se phekolwa ka thupa.

⁴ Se arabe sethoto ho ya ka bothoto ba sona, esere le wena wa tshwana le sona.

⁵ Araba sethoto ho ya ka bothoto ba sona, esere sa ipona se le bohlale.

⁶ Ya romeletsang ditaba ka sethoto, o ikgaola maoto, o ipiletsa ditlokotsi.

⁷ Maoto a sehlotsa a a fokola, maele a tswang molomong wa sethoto a jwalo.

⁸ Ho isa tlotla ho sethoto, ho tshwana le ho tlamella lejwe, ho le tlamella letjeketjaneng.

⁹ Maele a tswang molomong, molomong wa sethoto, a ka moutlwa o hlabang letsoho la letahwa.

¹⁰ Jwaloka rametsu ya fulang a sa shebe, ya hirang sethoto kapa mofeta-ka-tsela, o jwalo.

¹¹ Sethoto se kgutlelang bothotong ba sona se tshwana le ntja e kgutlelang mahlatseng a yona.

¹² Motho ya ithetsang ka ho re o bohlale, o ka tshepa sethoto ho ena le yena.

¹³ Sekgoba se re: “Tau ke ena ka tseleng! Tau ke ena diterateng!”

¹⁴ Jwalokaha lemati le kwaleha le buleha, sekgoba le sona se meneka jwalo moalong wa sona.

¹⁵ Sekgoba se kenya letsoho ka sejaneng, empa se botswa ho le isa hanong.

¹⁶ Sekgoba se ithetsa ka ho re se bohlale, ho feta banna ba supileng ba nang le kelello.

¹⁷ Mofeta-ka-tsela ya kenang qabang tsa batho o ka motho ya sothang tsebe tsa ntja ya lelahleha.

¹⁸ Lehlanya le betsakang ditsenene, le metsu e bolayang,

¹⁹ le tshwana le motho ya thetsang mohahabo, ebe o re: “Ke ne ke itshwasetsa feela.”

²⁰ Ha patsi e fedile, mollo o a tima, ha ho se mosebi, qabang di a fela.

²¹ Mashala a tswala leupa, patsi e hotetsa mollo, motho wa dikgang yena o fehla diqabang.

²² Taba tsa bofuufu di monate haholo, di ka dijo tse theohelang hamonate maleng.

²³ Motho ya leme le monate a le pelo e mpe, o jwaloka pitsa ya letsopa e homilweng ka manya a silefera.

²⁴ Moikaketsi o ikgakanya ka polelo tsa hae, empa pelong ya hae o emere thetso.

²⁵ Leha a ka bua hamonate o se mo kgolwe, hobane bobe bo kgaphatseha pelong ya hae.

²⁶ Leha lehloyo la hae le ka ikgakanya ka thetso, bokgopo ba hae bo tla taloleha mahlong a bohle.

²⁷ Ya tjhekang lemena o tla wela ho lona, ya thetang lejwe le tla mo wela hodimo.

²⁸ Leleme le leshano le hloile bao le ba buang hampe, molomo wa leseaqheme wona o a timetsa.