Diproverbia 24 - BIBELE

19

¹ O se ke wa kgahlwa, wa kgahlwa ke ba kgopo, o se lakatse ho etsa setswalle le bona,

² hobane ba inahanela ho sebedisa dikgoka, melomo ya bona e bua dimpe.

20

³ Bohlale ke bona bo hahang ntlo, kutlwisiso yona e e tsitsise,

⁴ tsebo e tlatse dikamore ka mekgabo ya matlotlo a bohlokwa, matlotlo a kgahlehang.

21

⁵ Ya bohlale o matla ho feta senatla, ya nang le tsebo o feta sekwankwetla.

⁶ O lwana ntwa o itokiseditse yona hantle, o e hlole ka ho eletswa ke ba bangata.

22

⁷ Sethoto ha se utlwisise bohlale, ka kgotla se ke ke sa ahlamisa molomo.

23

⁸ Ya lohang mano a ho etsa bokgopo batho ba mmitsa rabolotsana.

⁹ Merero ya bothoto ke sebe, mosomi o nyonywa ke batho bohle.

24

¹⁰ Haeba o nyahama pelo mohla ditsietsi, o fela o fokollwa ke matla.

25

¹¹ Lopolla ba iswang lefung, o pholose ba iswang polaong.

¹² Ha o ka re: “Jo! re ne re sa tsebe!” Na ya bonang dipelo yena a ke ke a lemoha? Ya baballang bophelo ba hao yena o a tseba, motho ka mong o tla mo putsa ho ya ka mesebetsi ya hae.

26

¹³ Mora ka, eja mahe a dinotshi, hobane a a latsweha, o je kgekge ya dinotshi hobane e a hlabosa.

¹⁴ Tseba hore bohlale bo jwalo moyeng wa hao; ha o ka bo fumana o tla ba le katleho kamoso, tshepo ya hao e ke ke ya fela.

27

¹⁵ Se lalle ntlo ya motho ya lokileng jwalokaha senokwane se etsa; lapa la hae o se ke wa le senyetsa,

¹⁶ hoba leha ya lokileng a ewa hasupa, o ye a boele a tsohe, athe ba kgopo koduwa e a ba timetsa.

28

¹⁷ O se ke wa thabela ho wa ha sera sa hao, pelo ya hao e se nyakalle ha se kgothometseha;

¹⁸ esere Morena a bona, mme a nyatsa, a kgelosa kgalefo ya hae ho sona.

29

¹⁹ O se ke wa itshwenya ka ba etsang bobe, kapa wa kgahlwa ke ba etsang bokgopo;

²⁰ ya kgopo ha ho letho leo a le tshepileng, bone la bophelo ba hae le tla tingwa.

30

²¹ Mora wa ka, tshaba Morena le kgosi, o se ke wa ikopanya le mahlabaphiyo,

²² hobane hanghang koduwa e tla a wela hodimo. Ana ke mang ya ka tsebang tshenyo eo ba tla e etsa?

Polelo tse ding hape tsa ba bohlale

²³ Tsena ke polelo tse ding hape tsa ba bohlale: Ho ahlola ka leeme ha ho a loka.

²⁴ Ya reng ho ya kgopo: “Ha o na molato,” tjhaba di tla mo rohaka, merabe e mo nyonye;

²⁵ empa ba ahlolang ya molato ba tla atleha, mahlohonolo a ba atele.

²⁶ Ya arabang ka bokgabane o supa setswalle sa nnete.

²⁷ Hlopha mosebetsi wa hao o kantle, ebe o lema tshimo ya hao, o nto haha ntlo ya hao.

²⁸ O se be paki e tswang mohaeno ntle ho lebaka, polelo tse thetsang di se tswe molomong wa hao.

²⁹ O se ke wa re: “Ke tla busetsa molamu sefateng, kgalapa ke e buseletse ka kgalapa.”

³⁰ Ke ile ka feta pela tshimo ya sekgoba, ka ba ka feta rapeng sa morara sa ya sethoto,

³¹ ka bona di rarieletswe ke meutlwa, bobatsi le bona bo entse mofero, marako le wona a se a helehile.

³² Ka bona, ka ba ka imamela, ka tadima, ka ithuta sena:

³³ Ha o ka re shwa! wa boela wa re shwa! wa phuthaphutha matsoho, wa iphomolela,

³⁴ fuma ba hao bo tla o nanarela, bo o nanarele jwaloka senokwane, tlala e o wele hodimo sa motho a nkile dihlomo.