Diproverbia 23 - BIBELE

6

¹ Ha o dula tafoleng, o eja le mmusi, hopola hantle hore na o dutse le mang;

² haeba o itseba o le monyollo, ako itshware, o je jwaloka motho;

³ o se kgalle dimenyemenye tsa hae, hoba hase dijo empa e le maraba.

7

⁴ O se ka itja matla hore o ithuise; eba le bohlale ba ho itshwara.

⁵ Ha o re maruo hedi! o tla bona a sa nyametse, hobane a tla fela a mele mapheo, a fofele hodimo sa ntsu, sa ntsu e le sepakapakeng.

8

⁶ Se je dijo tsa ya lekgonatha, o se ke wa kgalla dimenyemenye tsa hae,

⁷ hobane kamehla o nahana theko ya tsona. O re ho wena: “Eja, o nwe,” feela pelo ya hae yona ha e rialo.

⁸ O tla hlatsa le thathana eo o e jeleng, ebe mantswe a hao a monate a teboho a senyehile.

9

⁹ O se ikgathatse ho bua le sethoto, hoba se tla nyedisa bohlale ba dipuo tsa hao.

10

¹⁰ O se ke wa tlosa mokolokotwane wa kgale, kapa wa hapa masimo a dikgutsana,

¹¹ hoba Mosireletsi wa tsona o matla, ke yena ya tla emela nyewe ya tsona.

11

¹² Pelo ya hao e thahaselle ho ithuta, tsebe tsa hao di mamele puo tse nang le tsebo.

12

¹³ Se hlokise ngwana wa hao kgalemo, thupa ke mosesetso e ke ke ya mmolaya.

¹⁴ Mo sasare ka leswai, o tla mo phemisa lefu.

13

¹⁵ Mora ka, haeba o le bohlale, le nna ke tla thaba;

¹⁶ pelo ya ka e tla nyakalla ha o bua seo e leng nnete.

14

¹⁷ Pelo ya hao e se kgahlwe ke baetsadibe, empa kamehla o tjhesehele ho tshaba Morena.

¹⁸ Ruri o sa na le seo o se tshepileng kamoso, mme tshepo ya hao e ke ke ya ba ya fela.

15

¹⁹ Mamela, mora ka, o tlo hlalefe, o tsamaye tseleng e nepahetseng.

²⁰ Se tsamaye le ba itlopang veine, kapa ba kgetshelakang dinama,

²¹ hoba matahwa le menyollo e a futsaneha ho tsherehana ho e apesa marantha.

16

²² Mamela ntatao ya o tswetseng, O se nyedise mmao ha a tsofetse.

²³ Reka nnete le bohlale le tayo le kutlwisiso, mme o se ke wa ba wa di rekisa.

²⁴ Ntata ya lokileng o nyakalla haholo; ya nang le mora ya bohlale o itumela ka yena.

²⁵ Ntatao le mmao ba ke ba thabe, mmao ya o tswetseng a ke a nyakalle!

17

²⁶ Mora ka, ako nnee pelo ya hao, mahlo a hao a kgahlwe, a kgahlwe ke metsamao ya ka,

²⁷ hobane seotswa ke lemena le tebileng, seraburabu sona ke mokoti o patisaneng;

²⁸ se lalla jwaloka senokwane, se atisa dihlola hara banna.

18

²⁹ Ya madimabe ke mang? Ya hlomohileng ke mang? Ya dikgang ke mang? Ya tletlebang ke mang? Ya meupa ya bosawana ke mang? Ya mahlomafubedu ke mang?

³⁰ Ke ba hlanyetsang veine, ba yang ho latswa veine e tswakilweng.

³¹ O se ke wa tadima veine ha e le kgubedu, ha e phophoma kahara mopotjwana, ha e re lelele! hamonate mmetsong.

³² E qetella ka ho loma jwaloka noha, mahloko a tjhatjhametse jwaloka a marabe.

³³ Mahlo a hao a tla bona pono disele, kelello ya hao e nahane dintho tse ferekanyang.

³⁴ O tla ba jwaloka ya robetseng bodibeng ba lewatle, ya paqameng hodima mehala ya sekepe.

³⁵ O tla re: “Ba nkotlile, empa ha ke a utlwa bohloko! Ba ntjhapile, empa ha ke utlwe letho! Ekaba ke tla tsoha neng, ke tswe ke tshwara mohotswana, ke o tshwara hape?”