Diproverbia 21 - BIBELE

¹ Pelo ya kgosi e ka atleng tsa Morena, o e isa moo a ratang sa metsi a molatswana.

² Motho o bona tsela tsohle tsa hae, o di bona di nepahetse, empa Morena ke yena ya lekolang pelo.

³ Ho etsa ho lokileng le ho phetha toka ho amoheleha ho Morena ho feta sehlabelo.

⁴ Fahleho se hwapileng le pelo e ikgohomosang, e leng lebone la ba kgopo, ke sebe!

⁵ Merero ya ya mafolofolo e mo tlisetsa nala, lepotlapotla lona le ikisa bofumeng.

⁶ Tlotlo le fumanwang ka ho bua leshano ke mouwane o fetang le leraba la lefu.

⁷ Dikgoka tsa ba kgopo di tla ba timetsa, hoba ba hana ho etsa ho lokileng.

⁸ Tsela ya ba molato e matswedintsweke, boitshwaro ba ba hlokang kodi bo otlolohile.

⁹ Ho molemo ho iphelela sekgutlwaneng, kahodima marulelo a ntlo, ho ena le ho phela le mmadikomang, ho phela le yena ka tlung e le nngwe.

¹⁰ Motho ya kgopo o labalabela bobe, ha a qenehele ya ahisaneng le yena.

¹¹ Ha mosomi a otlwa, ya se nang tsebo o a hlalefa; ha ya bohlale a rutwa, yena o fumana tsebo.

¹² Modimo ya lokileng o hlahloba lapa la ya kgopo, o timetsa ya kgopo ka baka la bokgopo ba hae.

¹³ Ya ithibang ditsebe ha mofutsana a lla, le yena o tla lla, empa a ke ke a mamelwa.

¹⁴ Mpho ya lekunutu e thethefatsa bohale, tjotjo e kgwaetsweng ka kobong, e kokobetsa kgalefo e tlokomang.

¹⁵ Ha ho sebetswa ka toka ba lokileng ba a thaba, athe ba kgopo bona ba tlalwa ke tshabo.

¹⁶ Ya kgelohang tsela ya kutlwisiso pheletso ya hae ke ho phomola hara bafu.

¹⁷ Ya hlanyetsang menyaka o tla fumaneha, ya ratang veine le dimenyemenye ha a ka ke a rua.

¹⁸ Ya kgopo o rekiswa bakeng sa ya lokileng, ya sa tshepahaleng yena bakeng sa ya kgabane.

¹⁹ Ho molemo ho iphelela hara lehwatata, ho ena le ho phela le nkwapo, mmadikomang.

²⁰ Lapeng la ya bohlale ho tletse menono, le maruo, athe sethoto sona se hafaka se sa qenehele.

²¹ Ya thahasellang ho loka le lerato o tla fumana bophelo le toka le tlotla.

²² Ya bohlale o hlasela qhobosheane ya bahale, a heletse marako ao ba a tshepileng.

²³ Ya kwalang molomo, a tshwara leme la hae, o iphemisa hore a se kene ditsietsing.

²⁴ Moikgohomosi ya mabefi o bitswa “mosomi”, boikakaso ba hae ha bo na tekanyo.

²⁵ Takatso ya sekgoba ke lefu ho sona, se leqe ho sebetsa, ho sebetsa ka matsoho a sona;

²⁶ se qeta letsatsi se lakatsa, se sa fumane, empa ya lokileng o fana a sa kganane.

²⁷ Sehlabelo sa ya kgopo se a nyonyeha, haholo ha a se etsa ka morero o mobe.

²⁸ Paki ya leshano e tla timela, polelo tsa ya qalang ka ho mamela di a amoheleha.

²⁹ Ya kgopo o sosobanya sefahleho, ya lokileng o hlokomela metsamao ya hae.

³⁰ Ha ho bohlale, kelello, kapa morero o ka atlehang ha Morena a sa o rate.

³¹ Pere e kwetlisetswa tsatsi la ntwa, empa tlholo yona ke ya Morena.