Diproverbia 2 - BIBELE

Melemo ya bohlale

¹ Mora wa ka, ha o ka mamela polelo tsa ka, wa boloka ditaelo tsa ka;

² wa sekehela bohlale tsebe, pelo ya hao ya labalabela ho ba le kutlwisiso;

³ ha o ka ipiletsa hore o be sedi, wa kopa hore o be le kutlwisiso;

⁴ ha o ka e batla sa hoja o batla silefera, wa e batla sa tlotlo e le patuwe;

⁵ kutlwisiso ya ho tshaba Morena o tla e fihlela, ho tseba Modimo le hona o ho fumane.

⁶ Ke Morena ya fanang ka bohlale, tsebo le kutlwisiso di tswa ho yena.

⁷ O hlokomela metsamao ya ba lokileng, ke thebe ho ba hlokang kodi.

⁸ O baballa ba lokileng tseleng tsa bona, batshepuwa ba hae a ba sireletse.

⁹ O tla utlwisisa ho loka, ho tshepeha, le ho nepahetseng, o utlwisise le ditsela tsohle, tsela tsohle, tse lokileng;

¹⁰ hobane bohlale bo tla kena pelong ya hao, tsebo e be boithabiso, boithabiso ba pelo ya hao.

¹¹ O tla baballwa ke ho ba le kelello, kutlwisiso e o sireletse,

¹² e o pholose tseleng tse kgopo, e o phemise ba buang tse mpe,

¹³ ba lahlang tsela tse lokileng, ba tsamayang tseleng tse lefifi.

¹⁴ Bona ba thabela ho etsa bobe, ba thabela bokgopo ba ba kgopo,

¹⁵ bao tsela tsa bona di kgopameng, metsamao ya bona e kgelohileng.

¹⁶ O tla phemiswa mosadi wa sehlola, mosadi ya ekang ka dipolelo,

¹⁷ ya sa tshepahaleng ho monna wa hae, ya lebalang selekane sa Modimo wa hae.

¹⁸ Lapa la hae le kgannela lefung, tsela tsa hae di isa ho ba shweleng.

¹⁹ Ba kenang lapeng leo ha ba ke ba kgutla, le tsela ya bophelo ha ba e fumane.

²⁰ Kahoo o tla tsamaya tseleng ya ba lokileng, o tsamaye tseleng ya ba hlokang kodi.

²¹ Ba lokileng ba tla phela lefatsheng, ba hlokang kodi ba ahe ho lona.

²² Ba kgopo ba tla fediswa lefatsheng, mahlabaphiyo a timetswe ho lona.