Diproverbia 19 - BIBELE

¹ Ho molemo ho ba mofutsana ya hlokang kodi, ho ena le ho ba sethoto se buang leshano.

² Ho tjheseha motho a hloka tsebo ha ho na thuso, ho ba mahlahahlaha ho lahlisa motho tsela.

³ Bothoto ba motho bo timetsa bophelo ba hae, ka pelong ya hae a korotlele Morena.

⁴ Leruo le atisetsa motho metswalle, athe mofutsana o furallwa le ke metswalle.

⁵ Paki ya bohata e tla ahlolwa, ya buang leshano a ke ke a phonyoha.

⁶ Ba bangata ba qekisa ho ratwa ke kgosi, bohle ke metswalle ya ya fanang dimpho.

⁷ Mofutsana o hlouwa le ke ba habo, metswalle ya hae yona e mo kgesa hakaakang! Leha a re o ipiletsa ho bona, ha ho moo a ba bonang teng.

⁸ Ya ipatlelang bohlale o rata bophelo ba hae, ya nang le kelello, katleho ke ya hae.

⁹ Paki ya bohata e tla ahlolwa, ya buang leshano o tla timela.

¹⁰ Sethoto ha se lokele ho hafa ka nkatana, jwalokaha lekgoba le sa lokele ho busa mahosi.

¹¹ Bohlale ba motho bo tswala mamello, ho iphapanyetsa diphoso ke yona tlotla ya hae.

¹² Kgalefo ya kgosi e jwaloka tau ha e puruma, mohau wa yona o jwaloka phoka hodima jwang.

¹³ Mora ya sethoto o tlisetsa ntatae koduwa, komang tsa mosadi di ka metsi a rothang, ho ya ho ile ha pula e na.

¹⁴ Ntlo le maruo ke lefa le fumanwang ho bo-ntata, mosadi ya bohlale ke mpho ya Morena.

¹⁵ Botswa bo isa motho le sephume sa boroko, sekgoba sona se bolawa ke tlala.

¹⁶ Ya bolokang ditaelo o baballa bophelo ba hae, ya sa hlokomeleng metsamao ya hae o tla shwa.

¹⁷ Ya hauhelang bafumanehi o adima Morena, seo a faneng ka sona Morena o tla mmuseletsa sona.

¹⁸ Laya ngwana wa hao o sa na le tshepo, o se thohothellwe ho mmolaya.

¹⁹ Motho ya halefang haholo o tla otlwa, ha o mo pholosa o tla boela o pheta hape.

²⁰ Sekehela keletso tsebe, o mamele ditaelo, e le hore qetellong o tle o hlalefe.

²¹ Merero e mengata ka pelong ya motho, empa wa Morena wona o hlola kamehla.

²² Meharo e hlabisa motho dihlong; ho molemo ho futsaneha ho ena le ho bua leshano.

²³ Ho tshaba Morena ho a phedisa, ya nang le tshabo eo o tla phela ka boiketlo, bobe bo ke ke ba mo wela hodimo.

²⁴ Tsoho la ya botswa le hanella ka sejaneng, o tswafa le ho le isa ka hanong la hae.

²⁵ Shapa mosomi, ya se nang tsebo a tle a hlalefe; kgalema ya hlalefileng, yena o tla fumana tsebo.

²⁶ Ya shapang ntatae, a phaladise mmae, ke ngwana ya hlabisang dihlong, ya tlontlollang.

²⁷ Mora wa ka, ha o ka kgaotsa ho mamela ditaelo o tla kgeloha dithuto tsa bohlale.

²⁸ Paki e kgopo e bapala ka toka, ya kgopo bokgopo bo a mo natefela.

²⁹ Basomi ba emetswe ke kahlolo, mekokotlo ya dithoto yona e emetswe ke phafa.