Diproverbia 17 - BIBELE

¹ Ho molemo ho itjella dikokotwana, ho itjella tsona ka kgotso, ho ena le ho phela tlung e nang le kgora le diqabang.

² Mohlanka ya masene a ka busa mora, a busa mora ya sethoto wa monga hae, a arolelwa lefa jwaloka bana ba monga hae.

³ Silefera e hlwekiswa ka ho qhibidiswa pitseng, kgauta yona e hlwekiswa ka sebopi sa yona; athe dipelo tsona di hlahlojwa ke Morena.

⁴ Ya etsang bokgopo o mamela polelo tsa leshano, ya leshano yena o mamela tsa bokgopo.

⁵ Ya somang mafutsana o soma Mmopi wa hae, ya thabelang tsietsi tsa e mong yena o tla otlwa.

⁶ Ditloholwana ke mofapahlooho, mofapahlooho a boraputswe, bana ba ithaba ka batswadi ba bona.

⁷ Sethoto ha se lokelwe ke puo tsa bokgeleke, puo ya leshano ha e lokele kgosana.

⁸ Tjotjo ke hakwe la bohlokwa, ke la bohlokwa ho mo-e-fani, e mo atlehisa ho tsohle tseo a di etsang.

⁹ Ya lalang diphoso ka mmele o qeka ho ratwa, athe ya di pepesang yena o senya setswalle.

¹⁰ Ya bohlale o phakisa ho amohela kgalemo, thoto ha se shapuwa halekgolo ha se mamele.

¹¹ Motho ya kgopo o thabela meferefere, ya jwalo o romellwa leqosa, leqosa le sehloho.

¹² Ho molemo ho kopana le bere e tshehadi, bere e nketsweng madinyane a yona, ho ena le ho kopana le sethoto se poqang bothotong ba sona.

¹³ Ya buseletsang botle ka bokgopo, bokgopo bo ke ke ba tloha lapeng la hae.

¹⁴ Qabang e qala jwaloka metsi a faposwa mosele, wena e kwekwetle e eso ka e kekela.

¹⁵ Ya lokollang ya kgopo le ya ahlolang ya lokileng, bobedi ba bona ke manyala ho Morena.

¹⁶ Thuso ke efe, ya ho nea sethoto tjhelete athe ha se na kutlwisiso ya ho reka bohlale?

¹⁷ Motswalle o na le lerato kamehla, ngwanabo motho o tswaletswe ho thusa, ho thusa mohla tsatsi la ditsietsi.

¹⁸ Ya hlokang kelello o itlama ka ditshepiso, o itlama ho lefa melato ya ba bang.

¹⁹ Ya ratang diphapang o rata sebe, ya ikgohomosang o ipitsetsa timelo.

²⁰ Motho ya pelo e kgopo ha a atlehe; ya leme le tletseng thetso o tla timela.

²¹ Ya tswalang sethoto o itswalla ditsietsi, ntata sethoto o hloka thabo.

²² Pelo e thabileng e tseba ho fodisa, empa moya o hlorileng o tepeletsa mmele.

²³ Motho ya kgopo o amohela tjotjo sephiring, ka yona o kgopamisa ditsela tsa toka.

²⁴ Bohlale bo mahlong a ya masene, mahlo a sethoto wona a thalatsa kahohle.

²⁵ Mora ya sethoto o tlisa masisapelo ho ntatae, bohloko ba pelo ya mmae bo baba seka leshokgwa.

²⁶ Ke phoso ho ahlola motho a se na molato, kapa ho otlela mahosana ho loka ha wona.

²⁷ Ya nang le tsebo o tswara leme la hae, ya nang le kutlwisiso ha a ke a halefa.

²⁸ Sethoto ha se kgutsitse ho thwe se hlalefile, se na le kutlwisiso ha se tshwara leme la sona.