Diproverbia 15 - BIBELE

¹ Ya arabang ka boikokobetso o tima kgalefo, empa polelo e kgahlapetsang e baka bohale.

² Leme la ya bohlale le ratisa batho tsebo, empa molomo wa sethoto o kopotsa bothoto.

³ Mahlo a Modimo a bona kahohle, a disa ba kgopo le ba lokileng.

⁴ Leme le thabisang ke fate sa bophelo, empa le thetsang le senya pelo ya motho.

⁵ Sethoto se nyedisa thuto ya ntata sona, athe ya ratang kgalemo yena o a hlalefa.

⁶ Ka tlung ya ya lokileng leruo le teng, empa ya kgopo leruo le mmakela ditsietsi.

⁷ Molomo wa ya bohlale o jala tsebo, pelo ya ya sethoto yona e mpe.

⁸ Mahlabelo a ya kgopo ke manyala ho Morena, empa thapelo ya ya lokileng e a mo kgahla.

⁹ Ditsela tsa ya kgopo ke manyala ho Morena, ya labalabelang ho loka yena o a mo rata.

¹⁰ Ya kgelohang tsela o tla otlwa haholo, ya hloileng kgalemo yena o tla timela.

¹¹ Morena o tseba tse ka Nqalong ya Bafu, le tse ka ho ya Timelo o a di tseba, a ka sitwa keng ho tseba makunutu a batho?

¹² Mosomi yena o hloile kgalemo, le ho ba bohlale a ke ke a batla keletso.

¹³ Pelo ha e thabile sefahleho se kganya kgotso, empa ha e hlomohile motho o utlwa bohloko.

¹⁴ Ya nang le kutlwisiso o labalabela tsebo, athe dithoto tsona di labalabela bothoto.

¹⁵ Ya tshwenngwang o phela habohloko ka nako tsohle, ya thabileng yena o keteka kamehla.

¹⁶ Sejosenyane se molemo ha o tshaba Morena, ho ena le maruo a o bakelang ditsietsi.

¹⁷ Ho molemo ho ja moroho o fanwang ka lerato, ho ena le matshufu a fanwang ka lehloyo.

¹⁸ Motho ya bohale o baka diqabang, ya nang le mamello yena o a di fedisa.

¹⁹ Tsela ya sekgoba e ririellane meutlwa, athe ya ya lokileng yona e bataletse hantle.

²⁰ Ngwana ya bohlale o thabisa ntatae, empa sethoto sona se nyedisa le mma sona.

²¹ Ya hlokang bohlale o thabiswa ke bothoto, ya nang le kutlwisiso yena o etsa ho lokileng.

²² Ya sa rateng dikeletso merero ya hae e a nyopa, ya eletswang ke ba bangata yena o a atleha.

²³ Karabo e nepahetseng e thabisa monga yona, e tlang ka nako ya yona e molemo hakaakang!

²⁴ Ho ya bohlale tsela ya bophelo ke e yang hodimo, ho mo phemisa ho theohela lebitleng.

²⁵ Morena o timetsa lapa la moikgantshi, empa o sireletsa moedi wa lapa la mohlolohadi.

²⁶ Mehopolo ya ya kgopo ke manyala ho Morena, polelo tsa ya lokileng tsona di kgahlisa Morena.

²⁷ Ya meharo o tlisetsa lapa la hae tsietsi, ya hloileng tjotjo yena o tla phela.

²⁸ Ya lokileng o inahana a eso arabe, molomong wa ya kgopo bokgopo bo a kopotsa.

²⁹ Morena o emeletse thoko, thoko le ba kgopo, thapelo ya ba lokileng o e sekehela tsebe.

³⁰ Ho tadima motho hantle ho thabisa pelo ya hae, taba tse molemo di mo tsosa molota.

³¹ Ya mamelang kgalemo e isang bophelong, o tla dula hamonate hara ba bohlale.

³² Ya sa natseng thuto o a inyedisa, empa ya mamelang kgalemo o ekeletswa kutlwisiso.

³³ Ho tshaba Morena ho ruta motho bohlale; ikokobetse pele, mme o tla tlotlwa.