Diproverbia 14 - BIBELE

¹ Mosadi ya bohlale o haha lapa la hae, empa ya sethoto o le qhala ka matsoho a hae.

² Motho ya lokileng o tshaba Morena, empa ya kgopo yena o nyedisa Morena.

³ Polelo tsa sethoto di se otlela boikgantsho, empa tsa ba bohlale tsona di a ba sireletsa.

⁴ Moo kgomo di leng siyo sejelo ha se na letho, tjhai e ba ngata ka matla a dipholo.

⁵ Paki e tshepahalang ha e ke e thetsa, empa ya bohata yona e bua leshano.

⁶ Mosomi o batla bohlale, empa ha a bo fumane, ya nang le kutlwisiso tsebo o e fumana habonolo.

⁷ Sutha pela sethoto, hobane ho sona tsebo ha e yo.

⁸ Ya bohlale o tseba ho kgetha tsela ya hae, sethoto se ithetsa ka bothoto ba sona.

⁹ Dithoto di tadima sebe e le papadi, ba lokileng ba tseba molemo wa poelano.

¹⁰ Motho o tseba bohloko ba pelo ya hae, ha ho e mong ya ka utlwang thabo ya yona.

¹¹ Ntlo ya ya kgopo e tla heletswa, leaho la ya lokileng lona le tla atleha.

¹² Tsela e teng e bonahalang e lokile ho monga yona, empa e qetella ka ho isa lefung.

¹³ E mong o tsheha a ntsa hlomohile, tsheho la hae le qetelle ka maswabi.

¹⁴ Motho ya kgopo o ahlolelwa melato ya hae, ya lokileng yena o putsetswa diketso tsa hae.

¹⁵ Kamehla ya se nang tsebo ke tumelakgweela, empa ya bohlale eka kgona a ikgodise.

¹⁶ Motho ya bohlale o tshaba bobe, o a bo ila, empa sethoto se a tlatselela, se a itshepa.

¹⁷ Motho ya halefang kapele o etsa bothoto, ya nang le mehopolo e mebe batho ba a mo hloya.

¹⁸ Lefa la ba se nang tsebo ke bothoto, athe moqhaka wa ba bohlale ke tsebo.

¹⁹ Ba kgopo ba kgumama kapela ba lokileng, baetsadibe bona kapela kgoro tsa ba lokileng.

²⁰ Mafutsana a hloilwe le ke ba ahisaneng le wona, empa barui ba na le metswalle e mengata.

²¹ Ya nyedisang ya ahisaneng le yena o etsa sebe, empa ho lehlohonolo ya hauhelang mofutsana.

²² Ba rerang bobe ba a lahleha, empa ba rerang botle ba fumana mohau le nnete.

²³ Mesebetsi yohle e na le moputso wa yona, empa ho berabera hona ho a futsanehisa.

²⁴ Meqhaka ya ba bohlale ke maruo a bona, bothoto ba dithoto bona bo tswala bothoto.

²⁵ Paki ya nnete e pholosa batho, athe ya bohata yona e bua leshano.

²⁶ Ya tshabang Morena o na le qhobosheane, bana ba hae ba fumana setshabelo.

²⁷ Ho tshaba Morena ke sediba sa bophelo, ya mo tshabang o phema maraba a lefu.

²⁸ Tlotla ya kgosi ke ho busa tjhaba se le sengata, athe kgosana e timela ke ho hloka setjhaba.

²⁹ Ya diehang ho halefa o na le kutlwisiso, athe sefelapelwana se bontsha bothoto.

³⁰ Pelo e nang le kgotso e phedisa motho hantle, empa mona o bodisa masapo a motho.

³¹ Ya hatellang mofutsana o nyedisa Mmopi wa hae, empa ya mo hauhelang yena o tlotla Modimo.

³² Ya kgopo o fediswa ke bokgopo ba hae, ya lokileng o na le letshepa, esita le lefung la hae.

³³ Ya nang le kutlwisiso o ruile bohlale, le hara dithoto bo a itotobatsa.

³⁴ Ho loka ho atlehisa setjhaba, empa sebe ke sekgobo ho sona.

³⁵ Kgosi e kgahlwa ke mohlanka ya bohlale, athe ya hlabisang dihlong yena e a mo halefela.