Diproverbia 13 - BIBELE

¹ Mora ya bohlale o mamela thuto ya ntatae, empa moikakasi ha a natse kgalemo.

² Motho o kgola tholwana tse monate, tholwana tsa dipuo tsa hae, ya sa tshepahaleng yena o lapetse mahahapa.

³ Ya tshwarang leme la hae o baballa bophelo ba hae, ya phasolohang feela yena o tla timela,

⁴ Sekgoba se a lakatsa, empa ha se fumane letho, sekgothadi se a atleha, se kgotsofatswa ke tsohle.

⁵ Motho ya lokileng o hloile leshano, ya kgopo ha a na dihlong, o a swabisa.

⁶ Toka e sireletsa ya lokileng, bokgopo bona bo kudupanya baetsadibe.

⁷ E mong o iketsa morui, a se na letho, e mong a iketse mofutsana, a hafa ka nkatana.

⁸ Bophelo ba motho bo ka lopollwa ka maruo a hae, mofumanehi yena ha a ke a sokelwa ke motho.

⁹ Lebone la ya lokileng le tuka haholo, empa bone la ya kgopo lona le tla tingwa.

¹⁰ Dikgang di hlahiswa ke boikakaso, bohlale bo fumanwa ho ba mamelang dikeletso.

¹¹ Maruo a bolotsana a tla fela hang, a kolletswang kahanyane wona a a eketseha.

¹² Tshepo e sa phethahaleng e nyahamisa pelo, takatso tse phethahatswang di ka fate sa bophelo.

¹³ Ya nyefolang dikeletso o tla timela, ya bolokang molao o tla amohela moputso.

¹⁴ Thuto ya ya bohlale ke sediba sa bophelo, e phemisa motho maraba a lefu.

¹⁵ Kelello e tjhatsi ho bohle e a kgahleha, tsela ya ba sa tshepahaleng e isa timelong.

¹⁶ Motho ya bohlale o sebetsa ka kelello, sethoto sona se pepesa bothoto ba sona.

¹⁷ Leqosa le kgopo le welwa ke ditsietsi, moromuwa ya tshepahalang o tlisa tse molemo.

¹⁸ Bofuma le dihlong di wela ya hanang kgalemo, tlotla e aparela ya sa haneng ho nyatsuwa.

¹⁹ Se labalabelwang ha se fihletswe se a thabisa, dithoto tsona ha di rate ho tela bobe.

²⁰ Ya tsamayang le bahlalefi o a hlalefa, molekane wa dithoto yena o a thotofala.

²¹ Bobe bo salama baetsadibe, ba lokileng bona ba putswa ka tse molemo.

²² Monna ya lokileng o siela tloholo tsa hae lefa, leruo la moetsadibe ke lefa la ba lokileng.

²³ Masimong a mofutsana tjhai e ba ngata, ba hlokang toka bona ba a e fedisa.

²⁴ Motho ya sa shapeng mora hae o mo hloile, athe ya ratang mora hae yena o a mo kgalema.

²⁵ Ya lokileng o a ja, a ikgotsofatse, empa ya kgopo yena o ngongorehela dijo.