Diproverbia 10 - BIBELE

Maele a Solomone

¹ Ana ke maele a Solomone: Ngwana ya bohlale o thabisa ntatae, ngwana ya sethoto ke masisapelo ho mmae.

² Maruo a fumanweng ka bokgopo ha a na thuso, empa toka e lokolla motho lefung.

³ Ba lokileng Morena ha a ba bolaise tlala, takatso tsa ya kgopo o a di nyopisa.

⁴ Ya phuthileng matsoho o tla futsaneha, athe matsoho a kgothetseng a ruisa monga wona.

⁵ Ya bokellang dijo hlabula ke ngwana ya bohlale, ya robalang ha ho kotulwa o hlabisa dihlong.

⁶ Mahlohonolo a aparela ba lokileng, polelo tsa ya kgopo di kwetlile bosoro.

⁷ Ho hopolwa ha mofu ya lokileng ho lehlohonolo, empa bitso la ya kgopo le ke ke la hopolwa.

⁸ Ya bohlale o tla mamela molao pelong ya hae, sethoto se beberang sona se tla timela.

⁹ Motho wa nnete o tsamaya a sireletsehile, ya se nang nnete, yena o tla senolwa.

¹⁰ Ya iphapanyetsang phoso o baka moferefere, sethoto se beberang sona se tla timela.

¹¹ Polelo tsa ya lokileng ke diba sa bophelo, athe tsa ya kgopo tsona di kwetlile bosoro.

¹² Lehloyo le fehla moferefere, athe lerato lona le iphapanyetsa diphoso tsohle.

¹³ Bohlale bo fumanwa dipolelong tsa ya nang le kutlwisiso, empa thupa e kgalema ya se nang kutlwisiso.

¹⁴ Ba bohlale ba ipokellela tsebo, empa polelo tsa sethoto di isa timelong.

¹⁵ Morui o tshepile maruo a hae, mofutsana o timetswa ke bofuma ba hae.

¹⁶ Mesebetsi ya ba lokileng e ba tlisetsa bophelo, empa ya ba kgopo e ba hulela sebeng.

¹⁷ Ya mamelang ha a kgalengwa o tseleng ya bophelo, empa ya sa mameleng, yena o a kgeloha.

¹⁸ Ya patang lehloyo ke mothetsi, ya sebang ba bang, yena ke sethoto.

¹⁹ Ya buang haholo sebe se teng polelong tsa hae, ya sa buabueng yena ke motho ya bohlale.

²⁰ Polelo tsa ya lokileng ke silefera e hlwekisitsweng, pelo ya ya kgopo ha e na thuso.

²¹ Polelo tsa ba lokileng di ruta ba bangata, thoto tsona di shwa ke ho hloka kutlwisiso.

²² Hlohonolo la Morena le entsha motho, ha ho maswabi ao le a tlisang.

²³ Sethoto se thabela ho etsa bobe, ya nang le kutlwisiso o thabela bohlale.

²⁴ Se tshajwang ke ya kgopo se tla mo wela hodimo, empa takatso ya ya lokileng e tla phethahatswa.

²⁵ Sefefo se sheshena ya kgopo se ye le yena, motheo wa ya lokileng o hlola kamehla yohle.

²⁶ Jwalokaha asene e thellisa meno a motho, mosi le wona o llisa mahlo a motho, sekgoba se jwalo ho ba se romang.

²⁷ Ho tshaba Morena ho lelefatsa phelo ba motho, empa lemo tsa ba kgopo di tla kgutsufatswa.

²⁸ Letshepa la ba lokileng le hlahisa thabo, athe la ba kgopo lona le a nyamela.

²⁹ Tsela ya Morena ke tshabelo sa ba lokileng, empa ba kgopo bona e a ba timetsa.

³⁰ Ya lokileng a ke ke a sisinyeha, empa ba kgopo ba tla fela lefatsheng.

³¹ Molomong wa ya lokileng ho tswa bohlale, leme le kgopameng le tla pongwa.

³² Ya lokileng o bua puo tse thabisang, athe ya kgopo o tseba ho sokamisa ditaba.