Dipesaleme 96 - BIBELE

Modimo ke kgosi le moahlodi wa lefatshe

¹ Binelang Morena sefela se setjha, lona ba lefatshe lohle le ke le binele Morena.

² Binelang Morena, bokang lebitso la hae, ka letsatsi le letsatsi, phatlalatsang le phatlalatse tsa ho pholosa ha hae.

³ Bolelang tsa tlotla ya hae hara ditjhaba, le dimakatso tsa hae hara merabe yohle.

⁴ Morena o moholo, o lokelwa ke thoriso e kgolo, o tshabeha ho feta medimo yohle.

⁵ Medimo yohle ya baditjhaba ke mafeelafelane, athe Morena ke yena ya entseng mahodimo.

⁶ O eteletswe pele ke tlotla le botlotlehi, matla le kganya di Sehalalelong sa hae.

⁷ Thoholetsang Morena, lona ditjhaba tsa mefutafuta, thoholetsang tlotla le matla a Morena.

⁸ Thoholetsang tlotla e lokelang lebitso la Morena, tloong mabaleng a hae, le mo nyehelle.

⁹ Kgumamelang Morena le kgabile ka tse halalelang, lefatshe lohle le thothomele, le thothomele kapele ho yena.

¹⁰ Ereng ho baditjhaba: “Morena ke kgosi, o tiisitse lefatshe, le ke ke la sisinyeha; o ahlola ditjhaba ka ho loka.”

¹¹ Mahodimo a ke a thabe, lefatshe le nyakalle, lewatle le hwase le tsohle tse ka ho lona.

¹² Naha e nyakalle le tsohle tse ho yona, difate tsa meru di etse ditlatse

¹³ kapele ho Morena, hobane o a tla, o tlilo ahlola lefatshe. O tla ahlola lefatshe ka toka, le ditjhaba ka nnete ya hae.