Dipesaleme 95 - BIBELE

Setjhaba se memelwa ho rorisa Modimo

¹ Tloong, a re etsetseng Morena mehoo, re mo etsetse mehoo ya thabo, lefika le re pholosang re le etsetse ditlatse.

² A re itlhahiseng kapele ho yena, re itlhahise ka teboho, re mo rokeng ka mehoo ya thabo.

³ Morena ke Modimo e moholo, ke kgosi e kgolo, e phahametseng medimo yohle.

⁴ Dikgohlo tsohle tsa lefatshe di matsohong a hae, le tsona ditlhoro tsa dithaba ke tsa hae.

⁵ Lewatle ke la hae, ke yena ya le entseng; lefatshe o le bopile ka diatla tsa hae.

⁶ Tloong, a re itiheleng maotong a hae, re itihele ka hlompho, re weng ka mangwele kapele ho Morena, Morena, Mmopi wa rona.

⁷ Ke yena Modimo wa rona, re setjhaba se diswang ke yena, re mohlape o matsohong a hae. Kajeno ha le utlwa lentswe la hae,

⁸ se thatafatseng dipelo tsa lona jwaloka mohla Meriba, jwaloka mohla Masa, lehwatateng;

⁹ moo bo-ntata lona ba ileng ba nteka teng, ba nnonya leha ba ne ba bone diketso tsa ka.

¹⁰ Ka halefela moloko oo ka dilemo tse mashome a mane, ka ba ka re: “Ke setjhaba se pelo di kgelohileng, ha se tsebe ditsela tsa ka.”

¹¹ Yaba ke hlapanya ke halefile, ke re: “Ba ke ke ba ba ba kena ba kena phomolong ya ka.”