Dipesaleme 94 - BIBELE

Modimo o a phetetsa

¹ Morena, wena Modimo ya phetetsang, ako iponahatse, wena Modimo ya phetetsang.

² Tsoha, wena moahlodi wa lefatshe, o nee baikgohomosi moputso wa bona.

³ Ba kgopo ba tla thaba ho fihlela neng? E tla ba ho fihlela neng, Morena?

⁴ Ba a hehla, ba bua ka boikakaso, bohle ba kgopo ba a ithorisa.

⁵ Morena, ba hatakela setjhaba sa hao, ba hatella bao e leng lefa la hao.

⁶ Ba fenetha mohlolohadi le mojaki, ba bolaya le dikgutsana.

⁷ Ba re: “Morena ha a bone, Modimo wa Jakobo ha a lemohe.”

⁸ Utlwisisang, lona setjhaba sa mawatla; dithoto ting! le tla hlalefa neng?

⁹ Na ya entseng tsebe a ke ke a utlwa? Ya bopileng leihlo na a ke ke a bona?

¹⁰ Na yena ya kgalemelang ditjhaba a ke ke a di otla, yena ya rutang batho bohlale?

¹¹ Morena o tseba mehopolo ya motho, o a tseba hore ke lefeela.

¹² Morena, ho lehlohonolo motho eo o mo kgalemelang, eo o mo rutang ka Molao wa hao,

¹³ hore o tle o mo kgatholle, o mo kgatholle matsatsing a mabe, ha ba kgopo bona ba tjhekelwa lemena.

¹⁴ Morena a ke ke a furalla tjhaba sa hae, a ke ke a lahla bao e leng lefa la hae.

¹⁵ Dikahlolo di tla boela di etswa ka toka, bohle ba pelo di ntle ba tla e latela.

¹⁶ Ke mang ya tla ntshireletsa ho ba kgopo? Ke mang ya tla mpuella ho ba bolotsana?

¹⁷ Hoja Morena a se ke a nthusa, nka be ke se ke robetse lebitleng.

¹⁸ Moo ke reng: “Leoto la ka le a thella,” mohau wa hao o a ntshehetsa, Morena.

¹⁹ Ha pelo ya ka e touta haholo, matshediso a hao a hlabolla moya wa ka.

²⁰ Na o ka ba le kopano le baahlodi, baahlodi ba kgopo, ba fetolang bobe molao?

²¹ Ba ikopanya mmoho ho fedisa bophelo ba ya lokileng, ba ahlolela ya se nang molato lefu.

²² Empa Morena ke qhohosheane ya ka, Modimo wa ka ke lefika leo ke tshabelang ho lona.

²³ O tla ba buseletsa bokgopo ba bona, a ba timetse ka baka la bobe ba bona. Morena Modimo wa rona, o tla ba timetsa.