Dipesaleme 90 - BIBELE

Boholo ba Modimo le bofokodi ba motho

¹ Thapelo ya Moshe, mohlanka wa Modimo. Morena, o bile setshabelo sa rona melokong yohle.

² Dithaba di eso be teng, le lefatshe, le tsohletsohle di eso hlahe, haesale o le Modimo ya se nang bofelo.

³ O kgutlisetsa motho leroleng, o re: “Kgutlang, bana ba batho.”

⁴ Mahlong a hao dilemo tse sekete di ka letsatsi la maobane le seng le fetile, di ka nakwana ya bosiu.

⁵ O fedisa batho hanghang, e be e ke ke toro, ba ka jwang bo melang hoseng.

⁶ Hoseng bo a mela, bo palese; mantsiboya bo a pona, bo omelle.

⁷ Re fediswa ke kgalefo ya hao, re thothometswa ke bohale ba hao.

⁸ Makgopo a rona o a a bona, dibe tsa rona tse patehileng wa di bea pontsheng ya hao.

⁹ Ditshiu tsa rona tsohle di a kgutsufala, di kgutsufatswa ke bohale ba hao, dilemo tsa rona di feta jwaloka mofehelo.

¹⁰ Ditshiu tsa ho phela ha rona ke dilemo tse mashome a supileng; ha re phela hantle, di mashome a robedi. Empa bongata ba tsona ke ba ditsietsi le mahlomola; di feta kapele, ebe re ile.

¹¹ Ke mang ya ka tsebang matla a bohale ba hao, le ho tshabeha ha kgalefo ya hao?

¹² Kahoo re rute ho bala ditshiu tsa rona, pelo tsa rona di tle di hlalefe.

¹³ Ako boele o re hopole, Morena! O tla dieha ho fihlela neng? Qenehela bahlanka ba hao. E sa le hoseng,

¹⁴ re sitse ka mohau wa hao, re tle re o etsetse ditlatse, re thabe ka matsatsi wohle.

¹⁵ Ako re thabise ka matsatsi a lekanang le ao o re hlokofaditseng ka wona, le ka dilemo tse lekanang le tseo re bileng madimabe, ra ba madimabe ka tsona.

¹⁶ Ako bonahatse mosebetsi wa hao ho bahlanka ba hao, le kganya ya hao ho bana ba bona.

¹⁷ Morena Modimo wa rona a ke a be mosa ho rona, a atlehise mosebetsi wa matsoho a rona, e, a atlehise mosebetsi wa matsoho a rona.