Dipesaleme 9 - BIBELE

Ho leboha Modimo ka baka la toka ya hae

¹ Pesalema ya Davida. Taelo ho motsamaisi wa dibini: E binwe ka lentswe le lesesanyane.

² Morena, ke o boka ka pelo ya ka yohle, ke bolela dimakatso tsohle tsa hao.

³ Ke a o thabela, ke nyakallela ho wena; ke roka lebitso la hao, wena Ya Hodimodimo.

⁴ Dira tsa ka di tjhetjhile ka santhao, di kgopilwe, tsa timela ha o hlaha,

⁵ hobane o emetse nyewe ya ka le ditokelo tsa ka, o dutse teroneng ya hao o le moahlodi ya lokileng.

⁶ O kgalemetse ditjhaba, wa timetsa ba kgopo, mabitso a bona wa a hlakolela ruri.

⁷ Dira di ripitletswe ruri; metse ya tsona o e fetotse masupi, ha e sa tla hlola e hopolwa.

⁸ Empa Morena o busa kamehla, terone ya hae o e theetse ho ahlola.

⁹ O ahlola lefatshe ka toka, ditjhaba o di ahlola a se na leeme.

¹⁰ Morena e ke e be qhobosheane ya ba hatellwang, qhobosheane nakong ya matshwenyeho.

¹¹ Ba tsebang lebitso la hao ba ke ba o tshepe, ba o tshepe hobane wena Morena, o ke ke wa furalla ba o batlang.

¹² Rokang Morena ya busang Sione, phatlalatsang diketso tsa hae, le di phatlalatse hara ditjhaba,

¹³ hobane ya phetetsang madi o hopola bahlophehi, ha a lebale sello sa bona.

¹⁴ Nkgauhele Morena, tadima kamoo ke hlophehileng kateng, ke hlophehile ka baka la ba ntlhoileng, wena ya nnyolotseng kgorong ya motse wa bafu,

¹⁵ e le hore ke tle ke bolele dithoko tsa hao, ke di bolele kgorong ya motse wa Sione, mme ke nyakalle hobane o mpholositse.

¹⁶ Ditjhaba di wetse lemeneng leo di le tjhekileng, maoto a tsona a tshwasitswe ke leraba leo di le tjhehileng.

¹⁷ Morena o itsebahaditse, o phethahaditse kahlolo, ba kgopo ba kgatilwe ke mesebetsi, mesebetsi ya diatla tsa bona.

¹⁸ Ba kgopo ba ikela Nqalong ya Bafu: tjhaba tsohle tse sa reng letho ka Modimo.

¹⁹ Mafutsana a ke ke a leballwa ruri, tshepo ya bahlophehi e ke ke ya fetoha lefeela.

²⁰ Thusa, Morena! Motho a se ke a kgantsha matla, ditjhaba di ahlolwe kapela hao.

²¹ Di kenye letswalo, Morena; ditjhaba di ke di tsebe hore e ntse e le batho feela.