Dipesaleme 89 - BIBELE

Ditshepiso tsa Modimo ho Davida

¹ Pesalema ya Etane wa Moesera, e nang le thuto.

² Ke tla bina tsa mohau wa Morena, ke di bine kamehla, ka molomo wa ka ke tla tsebisa meloko yohle botshepehi ba hao;

³ hobane o itse: “Mohau wa ka o hlola kamehla yohle, botshepehi ba ka bo theilwe mahodimong.

⁴ “Ke entse selekane le mokgethwa wa ka, ke hlapanyeditse Davida, mohlanka wa ka, ka re:

⁵ ‘Ke tla etsa hore leloko la hao le hlole kamehla yohle, ke tiise terone ya hao melokong yohle.’ ”

⁶ Morena, mahodimo a a boka, a boka dimakatso tsa hao, a bolela botshepehi ba hao phuthehong ya bahalaledi.

⁷ Ke mang, mahodimong, ya ka lekanngwang le Morena? Ke mang ya tshwanang le Morena, hara bara ba Modimo?

⁸ Phuthehong ya bahalaledi Modimo o tshajwa haholo, o hlomphuwa haholo ke bohle ba mo teetseng hare.

⁹ Morena, Modimo wa mabotho, ke mang ya kang wena? Morena, wena ya matla, botshepehi ba hao ke kobo ya hao.

¹⁰ Ke wena ya busang lewatle le befileng, ke wena ya kgutsisang maqhubu a bilohang.

¹¹ Ke wena ya qhemeditseng Rahaba, wa moqhemetsa jwaloka setopo, ka tsoho la hao le matla o qhalakantse dira tsa hao.

¹² Mahodimo ke a hao, le lefatshe ke la hao; lefatshe le tsohle tse ho lona ke wena ya di theileng.

¹³ Leboya le borwa ke wena ya di hlodileng, Tabore le Heremone di etsetsa lebitso la hao ditlatse.

¹⁴ O sefea, letsoho la hao le matla; letsoho la hao le letona le phahame.

¹⁵ Ho loka le toka ke motheo wa terone ya hao, mohau le botshepehi di o eteletse pele.

¹⁶ Ho lehlohonolo setjhaba se tsebang ho etsa mehoo ya thabo, se tsamayang kganyeng ya sefahleho sa hao, Morena,

¹⁷ se thabelang lebitso la hao kamehla, se phahamiswang ka baka la ho loka ha hao.

¹⁸ Ke wena matla ao se ithorisang ka wona, o re tsosa molota ka ho rata ha hao.

¹⁹ Thebe ya rona ke ya Morena, kgosi ya rona ke ya Ya Halalelang wa Iseraele.

²⁰ Wa na wa bua le batshepuwa ba hao, wa bua le bona ka pono, wa re: “Ke thusitse mohale, ka phahamisa ya kgethilweng, ya kgethilweng hara setjhaba.

²¹ Ke fumane Davida, mohlanka wa ka, ka mo tlotsa ka ole ya ka e halalelang.

²² Seatla sa ka se tla mo tshehetsa, letsoho la ka le mo matlafatse.

²³ Ha ho sera se tla mo tsometsa, le ya kgopo a ke ke a mo hlola.

²⁴ Ba mo lwantshang ke tla ba ripitla mahlong a hae, ke fenye ba mo hloileng.

²⁵ Botshepehi ba ka le mohau wa ka di tla ba le yena, ka lebitso la ka o tla tsoha molota.

²⁶ Ke tla namisa mmuso wa hae ho ya fihla Lewatleng, le puso ya hae ho ya fihla dinokeng.

²⁷ O tla re ho nna: ‘O ntate, wena Modimo wa ka, lefika le mpholosang.’

²⁸ Nna ke tla mo etsa letsibolo, a phahamele dikgosi tsohle, kgosi tsa lefatshe.

²⁹ Ke tla mo hauhela kamehla, selekane sa rona le yena e tla ba se tiileng.

³⁰ Ke tla etsa hore leloko la hae le hlole kamehla yohle, le terone ya hae e be teng ha mahodimo a ntse a le teng.

³¹ “Haeba bara ba hae ba furalla Molao wa ka, ba sa latele dikahlolo tsa ka;

³² ha ba tlola ditaelo tsa ka, ba sa boloke melao ya ka;

³³ ke tla ba kgalemella ditlolo tsa bona, ke ba kgalemelle tsona ka thupa, le melato ya bona ka phafa.

³⁴ Feela Davida nke ke ka mo amoha, ka mo amoha mohau wa ka, ka kweneha botshepehing ba ka.

³⁵ Nke ke ka kwenehela selekane sa ka; seo ke se buileng nke ke ka se fetohela.

³⁶ Ke hlapantse hanngwe feela ka lebitso la ka le halalelang: Ha nka ke ka thetsa Davida.

³⁷ Leloko la hae le tla hlola kamehla, terone ya hae e be teng ha letsatsi le ntse le le pela ka;

³⁸ e hlole kamehla jwaloka kgwedi, paki eo e tshepahalang e mahodimong.”

³⁹ Leha ho le jwalo, o halefetse motlotsuwa wa hao, wa mo lahla, wa mo nyedisa.

⁴⁰ O hlakotse selekane sa hao le mohlanka wa hao, wa silafatsa mofapahlooho wa hae, wa o silafatsa leroleng.

⁴¹ O dihile metero yohle ya hae, metse ya hae e haheleditsweng wa e fetola masupi.

⁴² Bo-mofetakatsela bohle ba mo hapetse tsa hae, a fetoha sesomo ho bao a ahisaneng le bona.

⁴³ O matlafaditse matsoho a ba mo lwantshang, wa thabisa dira tsohle tsa hae.

⁴⁴ O thithibantse bohale ba sabole ya hae, wa se ke wa mo tshehetsa ntweng.

⁴⁵ O mo amohile lere la puso, wa dihela terone ya hae fatshe.

⁴⁶ O kgutsufaditse matsatsi, matsatsi a botjha ba hae, wa etsa hore a aparelwe ke dihlong.

⁴⁷ Morena, o tla ipata ho fihlela neng? Kgalefo ya hao e tla tuka, e tuke jwaloka mollo ho fihlela neng?

⁴⁸ Morena, ako hopole bokgutshwanyane ba bophelo, hopola hore batho bohle o ba bopetse lefeela.

⁴⁹ Na motho o teng ya ka phelang, mme a se ke a shwa, ya ka itopollang matleng a Nqalo ya Bafu?

⁵⁰ Morena, o kae mohau wa hao, mohau wa hao wa pele, oo ka botshepehi ba hao o o hlapanyeditseng Davida?

⁵¹ Ako hopole ho hlapaolwa ha bahlanka ba hao, Morena! Ke jere dinyediso tse ngata tsa ditjhaba ka sefubeng sa ka.

⁵² Morena, dira tsa hao di re hlapaotse, di setse motlotsuwa wa hao morao di ntse di mo hlapaola.

⁵³ Ho bokwe Morena kamehla yohle! Amen. Amen.